100 буудалт даамын өсвөр, залуучуудын ДАШТ өнгөрөгч 10 дугаар сарын 25-аас энэ сарын 2-ныг хүртэл Польш улсын Шклярска-Поремба хотноо боллоо.

Дэлхийн 25 орны 300 гаруй тамирчин 10 насны ангилалд өрсөлдсөн тус тэмцээнд багийн дүнгээр Монгол Улсын даамчид аваргалж, алтан цом өргөлөө.

Тодруулбал, манай даамчид тэмцээний үндсэн төрөлд дөрвөн алт, хоёр мөнгө, хоёр хүрэл медаль хүртэн багийн дүнгээр тэргүүлж, гурав дахь жилдээ энэ төрлийн аварга болсон. Мөн рапид төрлөөс гурван алт, хоёр мөнгө, гурван хүрэл медаль хүртэж, багийн дүнгээр гутгаар байр эзэлсэн бол блиц тоглолтод таван алт, гурван мөнгө, хоёр хүрэл медаль хүртэж, багийн дүнгээр тэргүүлжээ.