Энэ жилийн Үндэсний их баяр наадмын бөхийн барилдаанд дөрөв давсан 32 бөх, 16 сур харваачийн нийт 48 тамирчны сорьцыг шинжлүүлэхээр энэ сарын 13-нд Герман улсын Дрезден хотын лаборатори руу илгээсэн.

Тус сорьцын хариу энэ даваа гарагт ирсэн бөгөөд үүнтэй холбогдуулан Үндэсний их баяр наадмыг зохион байгуулах хорооны Үндэсний бөхийн салбар хороо, Монголын үндэсний допингийн эсрэг байгууллага хамтран өнөөдөр мэдээлэл хийлээ.

Нийт 48 тамирчны сорьц илгээснээс 44 сорьцын хариу ирсэн байна. Эдгээрт допингийн төрлийн хориотой бодис илрээгүй аж. Харин үлдсэн дөрвөн сорьц нь лабораторийн нарийвчилсан шинжилгээнд орж байгаа тул хариу нь ирээгүй юм байна.

Тус дөрвөн сорьцын хариу хэдийгээр ирэх нь тодорхойгүй бөгөөд шинжилгээний хариу эерэг гарч, ямар нэг допингийн зөрчил илэрвэл тухайн тамирчинд мэдэгдэж эхэлснээс хойш тамирчны нэрийг зарлаж, олон улсын стандартын дагуу үр дүнгийн удирдлагын ажиллагаа хийдэг журамтай аж.