Буриад түмний соёлын өв уламжлал, зан заншлыг хадгалж, өвлүүлэн уламжлуулах зорилготой “Алтаргана-2024” наадам энэ сарын 26-28-ны өдрүүдэд Булган аймагт болно.

Учир нь хоёр жилд нэг удаа болдог тус наадам 2022 онд ОХУ-ын Өвөрбайгалийн Агын буриадын тойрогт болоход Булган аймаг тугийг авч дараа удаагийн наадмыг зохион байгуулахаар болсон юм.

Буриад зоны “Алтаргана” наадам анх 1994 онд Хэнтий аймгийн Дадал суманд зохион байгуулагдсан бөгөөд энэ жил 15 дахь удаагаа болж буй ажээ. Дэлхий даяар тархан амьдарч буй буриад монголчуудыг нэгтгэдэг эл наадамд 30 гаруй орноос 50 мянга гаруй хүн оролцох мэдээлэл байна.

Оролцогчид Дангина гоо бүсгүй, буриад сур харваа, буриад бөх, хурдан морины уралдаан, ардын дуу болон орчин үеийн буриад дуу дуулаачдын уралдаан, сээр шалгах уламжлалт наадам, яруу найргийн уралдаан, шагайн наадаан зэрэг өв соёлын онцлогоо илэрхийлсэн олон сонирхолтой тоглоом, наадгайгаар өрсөлдөж, аваргуудаа тодруулахаар төлөвлөжээ. 

"Алтаргана-2024" наадмын хөтөлбөрийг хүргэж байна.