Сонгуулийн ерөнхий хорооноос иргэд, ТББ, нам, эвсэл, хэвлэл мэдээллийн байгууллагуудын төлөөллийг байлцуулан сонгуулийн автоматжуулсан системийг шалган, туршиж танилцууллаа. 

Улмаар саналын хуудас болон төхөөрөмжийг аймгийн сонгуулийн хороо, цагдаа, тагнуулын байгууллагад хүлээж өгөх ажил явагдлаа. Мөн иргэд, ТББ-ын төлөөл саналын хуудсыг бөглөх болон хэвлэлтийн чанар, бэхний гаргац зэргийг шалгаж үзлээ.

УИХ-ын  2024 оны ээлжит сонгуульд 48 гишүүн намын жагсаалтаас сонгогдох ба нийт 22 нам, эвслээс 371 нэр дэвшигч нам, эвслийн жагсаалтад орсон байна. 

Аймаг, дүүргүүдийг бүсчлэн 13 тойрогт хуваасан. Тойрог тус бүрээс хамгийн их санал авсан мандатын тоотой тэнцүү тооны нэр дэвшигчид ялна. Нийт 78 гишүүн тойргоос сонгогдох ёстой. 

Мөн Саналын хуудсыг хэвлүүлэх, хүргүүлэх, хадгалах, хамгаалах тухай журмын 

• 2.11. Саналын хуудсыг хэвлүүлж дууссаны дараа хэвлэлтийн явцад гарсан гологдол саналын хуудсыг устгах ажлыг ажиглагчдыг байлцуулан ажлын хэсэг зохион байгуулж, тэмдэглэл үйлдэнэ.
•  2.12. Саналын хуудсыг хэвлэж дууссаны дараа саналын хуудасны хэвлэлийн эх, компьютерын файлыг нам, эвслийн болон төрийн бус байгууллагын ажиглагчдыг байлцуулан тухай бүр устгах ажлыг Ажлын хэсэг зохион байгуулж, тэмдэглэл хөтлөн сонгуулийн бусад баримтын хамт холбогдох журмын дагуу архивт хадгалуулна гэж тус тус заажээ. 

Энэ удаагийн саналын хуудас нь сонгуулийн тойрогт нэр дэвшигчид өгсөн саналыг тэмдэглэх, нам, эвсэлд өгсөн саналыг тэмдэглэх хоёр хэсэгтэй байхаар батлагдсан. Сонгуулийн тойрогт нэр дэвшигчид өгсөн саналыг тэмдэглэх хэсэгт тухайн тойрогт ноогдох мандатын тоотой тэнцүү нэр дэвшигчийг сонгож тэмдэглэнэ. Мандатын тооноос илүү эсвэл дутуу бөглөвөл, саналыг хүчингүйд тооцно. Харин саналын хуудасны нам, эвсэлд өгсөн саналыг тэмдэглэх хэсэгт өөрийн дэмжиж буй нэг нам, эвслийг сонгож тэмдэглэнэ. Нэгээс илүү нам, эвслийг сонгож тэмдэглэвэл санал хүчингүйд тооцогдохыг анхаарах ёстой юм.