Улсын төсвийн хөрөнгө оруулалтаар хэрэгжиж буй Хэнтий аймгаас Норовлин сум чиглэлийн 130 км хатуу хучилттай авто замын барилгын ажил гэрээний дагуу 2025 оны аравдугаар сарын 30-нд дуусах ч  төлөвлөсөн хугацаанаас нэг жилийн өмнө буюу 2024 онд ашиглалтад оруулахаар барилгын ажлыг гүйцэтгэж байна.

Нэгдүгээр багцын 68.6 км авто замын гүйцэтгэгч Наранбулаг-Хан ХХК нь 2023 онд эхний 50км-ыг гэрээт хугацаанаас өмнө байнгын ашиглалтад оруулсан. Үлдсэн хэсэг болох 18.6км авто замыг 2024 онд хүлээлгэн өгөхөөр ажиллаж байна.

Мөн хоёрдугаар багц болох 62 км авто замын гүйцэтгэгч Мотор Сервис ХХК нь төлөвлөсөн барилгын ажлаа төлөвлөсөн хугацаанаас давуулан гүйцэтгэж байгаа юм.

Зам, тээврийн хөгжлийн яамнаас 2024 онд авто замын салбарт 7 аймаг, 40 сум, хоёр хилийн боомтыг авто замаар холбох ажлыг эхлүүлэх зорилт дэвшүүлээд байна.

Эх сурвалж: Зам тээврийн хөгжлийн төв ТӨҮГ