УИХ-ын гишүүн асан Т.Аюурсайхан, "Эрдэнэс Тавантолгой" ХК-ийн гүйцэтгэх захирал асан Б.Ганхуяг нарын 11 хүнд холбогдох эрүүгийн хэргийн гэм буруугийн шүүх хуралдаан хоёр дахь өдрөө үргэлжилж байна.

Шүүгдэгч О.Данзанлувсантүдэвийн өмгөөлөгч өчигдөр нотлох баримтыг шинжлэн судлах үеэр хувийн байдалтай холбоотой зүйл яригдах учраас шүүх хуралдааныг хаалттай явуулж өгөх хүсэлт гаргасныг шүүх бүрэлдэхүүн хүлээн авч хаалтай горимоор хуралдахаар болсон юм.

Нийслэлийн Прокурорын газраас Эрүүгийн хуулийн тусгай ангид зааснаар:

• эрх мэдэл, албан тушаалын байдлаа урвуулан ашиглах,
• нийтийн албан тушаалтан хахууль авах,
• худал мэдүүлэх,
• зохион байгуулалттай гэмт бүлэг байгуулах, түүнд элсэх,
• үндэслэлгүйгээр хөрөнгөжих,
• хахууль өгөх,
• мөнгө угаах гэмт хэрэгт холбогдуулан Т.Аюурсайхан, Б.Ганхуяг, Т.Түвшинбаатар, Х.Батхишиг, О.Данзанлувсантүдэв, Б.Отгонжаргал, Г.Гантөмөр, О.Дагвадорж, И.Дагвадорж, П.Бадамханд, Б.Эрдэнэбаяр нарт яллах дүгнэлт үйлдэн шүүхэд шилжүүлээд байгаа юм.