“Усыг энх тайвны төлөө” сэдэвт сэтгүүл зүйн сайн бүтээлийн уралдааныг дэлхийн усны өдрийг тохиолдуулан Тогтвортой хөгжлийн төлөө сэтгүүлчид клубээс санаачлан Засгийн газрын хэрэгжүүлэгч агентлаг Усны газар, “Амгалан дэлхий” ТББ-тай хамтран зохион байгуулав. Уралдааны дүн гарч шагналт болон тусгай байр эзэлсэн сэтгүүлчид өнөөдөр шагналаа гардлаа.

Тус уралдаанд нийт 20 гаруй хэвлэл мэдээллийн байгууллага, түүний сэтгүүлчид оролцсоноос “Зууны мэдээ” сонины сэтгүүлчдийн “Туул сэтрэхэд бэлэн”, Dardas.mn сайтын сэтгүүлчийн “Хэзээ үерт автах бол гэж айгаад...” сурвалжилга шалгарсан тэргүүн байрт шалгарчээ. “Монголын үнэн” сонин болон Datastory.mn агентлагийн сэтгүүлчийн бүтээл дэд байр эзэлсэн байна. Харин гутгаар байрт манай редакцын хөгжлийн сэтгүүл зүйн цуврал сурвалжилгууд болон МҮОНТ “Монголын мэдээ” агентлагийн сэтгүүлчийн бүтээл шалгарлаа.

Энэхүү уралдааны зорилго нь иргэдийг баталгаатай, хүрэлцээтэй усаар найдвартай хангах, усны нөөцийг хамгаалах, хэмнэлттэй, зүй зохистой ашиглахад бүх нийтийг уриалах, үйлдэл хийх, сайн туршлагыг түгээн дэлгэрүүлэх, шийдвэр гаргах түвшний, харилцан хамаарал бүхий талуудын анхаарлын төвд усны нэн тулгамдсан асуудлыг хүргэж, шийдэл гаргахад нөлөөлөх байсан юм.