Цагдаагийн байгууллагаас өмгөөлөгч Г.Батбаяр энэ сарын 26-ны өдөр Хан-Уул дүүргийн 22 дугаар хорооны нутаг дэвсгэрт машиндаа нас барсан байдалтай олдсон талаар өмнө нь мэдээлж байсан.  Мөн өчигдөр иргэний нийгмийн байгууллагуудын төлөөлөл уг хэргийн талаар хэвлэлийн бага хурал зарласан. Тэгвэл өнөөдөр ЦЕГ-аас эл хэргийн талаар дахин мэдээлэл хийлээ. 

ЦЕГ-ын Урьдчилан сэргийлэх газрын Хэвлэл мэдээлэл, олон нийттэй харилцах хэлтсийн дарга, цагдаагийн дэд хурандаа Г.Пүрэвдэлгэр:

-Нийслэлийн Чингэлтэй дүүргийн тавдугаар хороонд оршин суудаг иргэн Б нь энэ сарын 21-ний өдөр гэрээсээ гараад ор сургаггүй алга болсон гэх гомдлыг түүний төрсөн дүү иргэн Н тус дүүргийн цагдаагийн газрын нэгдүгээр хэлтэст 25-ний өдрийн шөнө 00:57 минутад гаргасан. Иргэнээс ирүүлсэн гомдлын дагуу улсын хэмжээнд эрэн сурвалжлах ажиллагааг эхлүүлсэн. 

Эрэн сурвалжлах ажлын хүрээнд маргааш нь буюу дөрөвдүгээр сарын 26-ны өдөр Хан-Уул дүүргийн 22 дугаар хороонд байрлалтай “Богд хаан амралт”-ын гаднах автомашины зогсоол орчмоос иргэн Б-ын унаж явсан автомашин олдсон. Тус автомашинд цагдаагийн алба хаагчид холбогдох хууль тогтоомжийн дагуу хэргийн газрын үзлэгийг явуулж, баримтуудыг бататгаж авсан. 

Мөн үзлэгээр хохирогчийн нэр дээр бүртгэлтэй галт зэвсэг, сум, хонгио, гар утас олдсон. Тус баримтыг Шүүхийн шинжилгээний ерөнхий газар хүргүүлээд байна. 

Мөрдөн шалгах ажиллагааны хүрээнд талийгаач Б галт зэвсэг хэрэглэх сургалтад хамрагдаж, өөрийн нэр дээр галт зэвсэг худалдаж авсан нь тогтоогдсон. Төрсөн дүүг нь болон өмгөөлөгч Ц-г хууль ёсны төлөөлөгчөөр тогтоосон. Тэднээс ямар нэг санал хүсэлт гаргаагүй. 

Хэрэгт гэрчүүдээс мэдүүлэг авах, хяналтын камеруудыг хураан авах зэргээр прокурорын хяналтын хүрээнд мөрдөн шалгах ажиллагааг явуулж байна. Хэргийн газраас хохирогчийн гэрээслэл олдсон гэдэг нь ташаа. Хууль журмын дагуу, прокурорын хяналтын хүрээнд цогцос таниулах ажиллагааг явуулсан гэж мэдээлэв.