Сонгуулийн ерөнхий хорооны дарга П.Дэлгэрнаран, Нарийн бичгийн дарга Д.Даваа-Очир болон холбогдох албан тушаалтнууд МЕТА компанийн Төв Азийн орнууд, Монгол, Шри Ланка, Малдивын орнуудын төрийн бодлого хариуцсан захирал Сенүра Абейвардена тэргүүтэй төлөөлөгчдийг өнөөдөр хүлээн авч уулзлаа.

 Уулзалтад Сонгуулийн ерөнхий хорооны гишүүн Д.Баяндүүрэн, Тамгын газрын дарга Д.Бат-Эрдэнэ, гадаад харилцааны зөвлөх Ч.Баттөмөр, гадаад харилцааны ажилтан Б.Уянга, МЕТА компанийн Ази, Номхон далайн хөтөлбөрийн менежер Кю Кю Тэн, Хуурамч мэдээллийн бодлого хариуцсан менежер Алис Будисатрио, Мэдээллийн үнэн зөв байдал, стратегийн түншлэлийн хөгжил хариуцсан ажилтан Никол Хан, Түншлэлийн сүлжээ, Төв Азийн орнуудын бодлого хариуцсан менежер Аврора Ли нар оролцлоо.

Ээлжит сонгууль зохион байгуулах үйл ажиллагааны талаарх мэдээллийг сонгогчдод хүргэх болон сонгуулийн сурталчилгааны ил тод, нээлттэй, шударга байдлыг бүрдүүлэх, хуурамч мэдээ, мэдээлэл, хаягийг бүртгэж, устгах технологийн боломжийн талаар МЕТА компанийн төлөөлөгчид танилцуулав.

Ингээд сонгуулийн шударга байдлыг хангах хамтын ажиллагааны хүрээнд сонгогчдыг мэдээллээр хангах, хуурамч мэдээ мэдээлэл, хаягийг бүртгэж, устгах, тархалтыг бууруулах талаар талууд санал солилцож, хамтран ажиллах төлөвлөгөөгөө ярилцлаа. Хамтын ажиллагааны хүрээнд МЕТА компаниас улс төрийн нам болон хэвлэл мэдээллийн байгууллага, сэтгүүлчдийн төлөөлөлд маргааш Сонгуулийн ерөнхий хорооны байранд сургалт зохион байгуулах юм.

Эх сурвалж: Сонгуулийн ерөнхий хороо