Ази тивийн орнуудын эдийн засгийн төлвийг хүргэж байна.

Ази, Номхон далайн бүс нутагт дотоод эрэлт нэмэгдэх, хагас дамжуулагчийн экспорт сайжрах, аялал жуулчлал сэргэх нөлөөгөөр эдийн засгийн өсөлт эрсдэлд тэсвэртэй байх хүлээлттэй байгаагаас бүс нутгийн хөгжиж буй орнуудын эдийн засаг энэ онд дунджаар 4.9 хувиар өсөх төлөвтэй байна.

Азийн Хөгжлийн Банкнаас танилцуулсан 2024 оны дөрөвдүгээр сарын Азийн хөгжлийн төлөв тайланд тус тив эдийн засгийн өсөлтөө ирэх онд хадгална хэмээн тооцоолжээ. Олон улс оронд хүнсний бүтээгдэхүүний үнэ өссөнөөс үүдэн инфляцын түвшин сүүлийн хоёр жилийн турш өндөр байсан бол 2024, 2025 онд саарах эерэг төлөвтэй байна гэжээ.

Дотоод эрэлт болон экспорт нэмэгдсэнээр Өмнөд болон Зүүн өмнөд Азийн бүс нутгийн эдийн засаг эрчимтэй өсөж байгаа нь үл хөдлөх хөрөнгийн зах зээл унаж, дотоодын хэрэглээ буурснаас үүдсэн БНХАУ-ын эдийн засгийн өсөлтийн удаашралыг нөхөж, бүс нутгийн эдийн засгийн өсөлт тогтвортой байхад эергээр нөлөөлж байна. Энэтхэг улс Ази, Номхон далайн бүсийн өсөлтийн гол хөдөлгүүр хэвээр байх бөгөөд энэ онд 7.0 хувь, ирэх онд 7.2 хувь өснө. БНХАУ-ын эдийн засгийн өсөлт өнгөрсөн онд 5.2 хувь байсан бол энэ онд 4.8 хувь, ирэх онд 4.5 хувь болж саарах төлөвтэй.

“Азийн хөгжиж буй ихэнх орны эдийн засаг энэ онд болон ирэх онд тогтвортой, хурдацтай өснө гэж бид тооцоолж байна” хэмээн АХБ-ны Ерөнхий эдийн засагч Алберт Парк хэлээд

"Хэрэглэгчийн итгэл сайжирч, хөрөнгө оруулалт ерөнхийдөө эрсдэл даах чадвартай, тогтвортой болж сэргэж байна. Гадаад эрэлт, ялангуяа хагас дамжуулагчийн экспортын тухайд ч мөн сэргэх мөчлөг эхлэхээр байна"

хэмээн онцлов.

Гэвч эдийн засгийн төлөвт олон эрсдэл байгаа тул бодлого боловсруулагчид сонор сэрэмжтэй байх нь зүйтэй. Эдгээр эрсдэлд нийлүүлэлтийн сүлжээний тасалдал, АНУ-ын мөнгөний бодлогын тодорхойгүй байдал, цаг агаарын эрс тэс үзэгдэл, БНХАУ-ын үл хөдлөх хөрөнгийн зах зээлийн цаашдын уналт зэрэг багтаж байгаа юм.

Дэлхийн хэмжээнд үнийн өсөлтийн дарамт буурах ч, олон улс орон мөнгөний хатуу бодлого баримталсан хэвээр байгаа нь хөгжиж буй Ази, Номхон далайн инфляц энэ онд 3.2 хувь, ирэх онд 3.0 хувь болж буурахад нөлөөлнө. Гэсэн хэдий ч БНХАУ-ыг оруулахгүйгээр тооцвол, тус бүс нутгийн инфляц КОВИД-19 цар тахлын өмнөх үеийнхээс өндөр хэвээр байна.

Цагаан будааны үнээс үүдэн ялангуяа импортоос хамааралтай орнуудад хүнсний инфляц нэмэгджээ. 2024 оны дөрөвдүгээр сарын АХТ тайланд цагаан будааны үнэ энэ жил өндөр хэвээр байна хэмээн таамаглажээ. Цаг агаар муу учир ургац алдсан, Энэтхэг улс будааны экспортдоо хязгаарлалт тавьсан зэрэг нь үүнд нөлөөлөх гол шалтгаан. Улаан тэнгист усан онгоцууд дайралтад өртөж, Панамын суваг орчимд ган гачиг нүүрлэсэн зэргээс шалтгаалж дэлхий нийтээр тээврийн зардал нэмэгдсэн нь Азийн инфляцыг өсгөж болзошгүй гэж тус тайланд дурджээ.

Цагаан будааны үнийг тогтворжуулж, хүнсний аюулгүй байдлыг хамгаалахын тулд засгийн газрууд эмзэг бүлгийн иргэдэд зорилтот хэлбэрээр татаас олгохын зэрэгцээ зах зээлийн ил тод байдал, хяналтыг сайжруулах замаар үнийн хөөрөгдөл, их хэмжээгээр худалдаж авч нөөцлөх явдлаас урьдчилан сэргийлэх боломжтой.

Дунд болон урт хугацаандаа үнийг тогтворжуулахын тулд цагаан будааны стратегийн нөөц бий болгоход анхаарах. 

Хөдөө аж ахуйн бүтээмжийг нэмэгдүүлэх зорилгоор тогтвортой газар тариалан эрхлэлт, тариалангийн нэр төрлийг олшруулахыг дэмжиж, хөдөө аж ахуйн технологи, дэд бүтцэд хөрөнгө оруулалт хийхэд чиглэсэн бодлого хэрэгжүүлэх нь оновчтой.

Мөн бүс нутгийн хэмжээнд улс орнууд өөр хоорондоо хамтран ажиллах нь цагаан будааны үнийн огцом өсөлт болон түүний сөрөг нөлөөллийг зөөлрүүлэхэд чухал нөлөөтэйг дурдсан байна.

Сонирхуулахад, АХБ нь Ази, Номхон далайн бүс нутагт нэн ядуурлыг арилгах хүчин чармайлтаа үргэлжлүүлэхийн зэрэгцээ хүртээмжтэй, тогтвортой, эрсдэлийг даван туулах чадвартай хөгжлийг бүс нутагт цогцлоох зорилготойгоор үйл ажиллагаа явуулдаг. 1966 онд байгуулагдсан тус банкны нийт 68 гишүүн орны 49 нь тухайн бүс нутагт оршдог юм.