Монголын Үндэсний бөхийн холбооны "Үндэсний Алтан цомын төлөөх" барилдааны шигшээ найман баг шалгарч үлдээд байгаа билээ. Өчигдөр Өвөрхангай болон Өмнөговь аймгийн баг барилдаж, Өвөрхангайн баг ялж, шөвгийн дөрвөн багт шалгарч үлджээ.

Өвөрхангай аймгийн багт улсын гарди Ц.Бямба-Отгон, улсын харцага Х.Гантулга, улсын начин Б.Лхагвадорж, аймгийн хурц арслан О.Наранбаатар, цэргийн арслан Б.Өлзийсайхан, аймгийн арслан Т.Довчинсэмбээ нар барилдаж нийт 14 даваа авсан байна.

Харин Өмнөговь аймгийн багт улсын заан Ц.Одбаяр, улсын начин Ш.Дарханбат, улсын начин Э.Нямаа,  аймгийн арслан Т.Төгсдөлгөөн, аймгийн арслан Ц.Лувсан-Адъяа, аймгийн заан С.Доржпалам нар барилдаж нийт 11 давжээ.

Өвөрхангай аймгийн багийн дасгалжуулагчаар улсын начин Да.Батбаяр, Өмнөговь аймгийн багийн дасгалжуулагчаар улсын заан Ц.Одбаяр ажилласан байна.