Монгол цэргийн өдөр буюу Монгол Улсын орчин цагийн Зэвсэгт хүчин байгуулагдсаны 103 жилийн ойн түүхэн тэмдэглэлт өдөр тохиож байна. 

1921 оны гуравдугаар сарын 18-ны өдөр жанжин Д.Сүхбаатарын байгуулж, удирдсан ардын цэрэг Хиагт хотыг чөлөөлж байсан гэж түүхэнд тэмдэглэгдсэн байдаг.

Улмаар 1946 онд БНМАУ-ын Бага хурлын тэргүүлэгчдийн хурлаар ардын хувьсгалт цэргийн баярын өдөр тэмдэглэх тухай хэлэлцэхдээ ардын журамт цэрэг анхны ялалтаа байгуулж Хиагт хотыг чөлөөлсөн гуравдугаар сарын 18-ны өдрийг “Хувьсгалт цэргийн баярын өдөр” болгож жил бүр ёслон тэмдэглэхээр шийдвэрлэжээ.

Үүнээс хойш 2003 онд Монгол Улсын Их хурлаас баталсан “Нийтээр тэмдэглэх баярын болон тэмдэглэлт өдрүүдийн тухай хууль”-д гуравдугаар сарын 18-ныг “Зэвсэгт хүчний өдөр” хэмээн тэмдэглэсэн байна. Харин 2011 оны хоёрдугаар сарын 9-ний өдөр тухайн хуульд өөрчлөлт оруулж “Монгол цэргийн өдөр” болгожээ.