Сүхбаатар аймгийн Бурхан шашинтны төв Эрдэнэмандал хийдийн тэргүүн хамбаар ажиллаж байсан лхаарамба Д.Жавзандорж өнгөрөгч онд МБШТ Гандантэгчэнлин хийдийн тэргүүн, 30 дугаар Хамба номун ханаар томилогдсон.

Тэгвэл хаврын тэргүүн сарын шинийн 15-нд тус хийдэд шинэхэн тэргүүн хамбын ширээнд Егүзэр хутагт Данзанлувсанванжалыг залах ёслол болсон байна.

Егүзэр хутагт Данзанлувсанванжал нь Зүүн өмнөд хязгаарыг байцаан үзэж илбэн тохинуулах сайд, Егүзэр хутагт Жамсранжавын Галсандаш гэгээнтний тавдугаар дүр юм. Тэрбээр модон луу жилийн хаврын тэргүүн сарын шинийн гуравны өдөр хүрээ гавжийн дамжаа барьсан билээ.