Элсэлтийн шалгалтын бүртгэл өнөөдөр 09:00 цагаас албан ёсоор эхэлсэн байна. Бүртгэл ирэх дөрөвдүгээр сарын 26-ны 18:00 цагт дуусна. БҮТ-ийн сайтад хандаж цахимаар бүртгүүлэх боломжтой.
Элсэлтийн шалгалттай холбоотой Боловсролын үнэлгээний төвөөс хийсэн мэдээллийг багцлан хүргэж байна.
- Элсэлтийн шалгалтын бүртгэл өнөөдөр 09:00 цагаас албан ёсоор эхэлсэн байна. Бүртгэл ирэх дөрөвдүгээр сарын 26-ны 18:00 цагт дуусна. БҮТ-ийн цахим хуудаст хандаж цахимаар бүртгүүлэх боломжтой.
- Суралцагч хамгийн багадаа хоёр хичээл, хамгийн ихдээ 10 хичээлийг сонгож Элсэлтийн шалгалт өгөх эрх нь нээлттэй.
- Мөн элсэлтийн шалгалтад бүртгүүлсэн шалгуулагчдын заавал өгдөг Монгол хэл, бичгийн шалгалтын бүртгэл өнөөдөр 09:00 цагт эхэлжээ. Бүртгэл ирэх гуравдугаар сарын 15-ны өдрийн 18:00 цагт дуусна. Монгол хэл, бичгийн шалгалтыг дөрөвдүгээр сарын 6-ны өдөр орон даяар явуулахаар төлөвлөжээ.
- Монгол хэл, бичгийн шалгалтын босго оноо 400. Шалгуулагч тус шалгалтдаа тэнцээгүй ч бусад сонгосон хичээлээрээ Элсэлтийн шалгалтаа өгч болно. Гэвч Монгол хэл, бичгийн шалгалтын босго оноо хангаагүй тохиолдолд дотоодын их, дээд сургуульд элсэх боломжгүй юм байна.
- Энэ хичээлийн жилд 35485 суралцагч ЕБС-ийн 12 дугаар анги төгсөж байна. Тэдний тодорхой хувь нь элсэлтийн шалгалтад хамрагддаггүй бөгөөд өмнөх жилийн шалгуулагчдын тоог нэмж үзвэл 40 мянга орчим суралцагч Элсэлтийн шалгалт өгнө гэж БҮТ-ийн мэргэжилтнүүд тооцоолсон байна.
- Элсэлтийн шалгалттай холбоотой бүх мэдээллийг БҮТ-ийн мэргэжилтнүүд өнөөдрөөс эхлэн нийслэлийн болон орон нутгийн ЕБС-иудад танхимаар болон цахимаар өгнө.
- Хөгжлийн бэрхшээлтэй иргэн болон тусгай сургуулийн суралцагч Элсэлтийн шалгалтад хамрагдахаар бүртгүүлсэн бол өргөдөл буюу хүсэлт, эмчийн магадлагаа, сургуулийн тодорхойлолт зэрэг холбогдох бичиг баримтыг бүртгэлийн хугацаанд БҮТ-д ирүүлэх ёстой. Ингэснээр тухайн шалгуулагчид зориулсан орчин нөхцөлийг бүрдүүлдэг байна.
- Элсэлтийн шалгалтыг долоодугаар сарын 4-7-ны өдрүүдэд орон даяар 50 шалгалтын байранд зохион байгуулна.
- Шалгуулагч элсэлтийн шалгалт өгөхөөр ирэхдээ иргэний үнэмлэх, бүртгэлийн хуудас, суудлын хуваарь, Бүрэн дунд боловсролын үнэмлэхийг авч ирнэ.
- Монгол хэл, бичгийн шалгалт болон Элсэлтийн шалгалтын математик, физик, химийн шалгалтын үргэлжлэх хугацаа 100 минут. Монгол хэл, англи хэл, орос хэл, түүх, биологи, газар зүй, нийгэм судлалын шалгалтын үргэлжлэх хугацаа 80 минут байна.
- Дүн оноо, шалгалтын материалын засалтын үйл ажиллагааг шууд засалтын шилэн технологи шалгалт бүрийн дараа шалгуулагчийн анхны оноог мэдээлнэ. Элсэлтийн шалгалтын дүн оноог блокчейнд байршуулна.
- Монгол хэл, бичгийн болон Элсэлтийн шалгалтын дүн оноо бүхий Батламж хуудсыг шалгуулагч дүн оноо зарласны дараах өдрөөс БҮТ-ийн mn сайт болон e-mongolia.mn – ээс хэвлэж авах боломжтой.
- Уг батлам хуудас нь шалгалт өгснөөс хойш 2.8 жилийн хугацаанд хүчинтэй байна.
- Олон улсад нийтлэг хүлээн зөвшөөрдөг Кембрижийн А8, А түвшний олон улсын шалгалт, IELTS, TOEFL, SAT зэрэг хөтөлбөр, шалгалтын үнэлгээг Элсэлтийн шалгалтын үнэлгээтэй дүйцүүлнэ. Элсэлтийн шалгалтын журам шинэчлэгдсэнээр дүйцүүлэх заалтуудыг нарийвчлан өөрчилсөн тул үнэлгээ дүйцүүлэх шалгуулагчид сайтар анхаарч, танилцах хэрэгтэй БҮТ-өөс зөвлөлөө.
- Дүйцүүлэх хүсэлтийг БҮТ-д гуравдугаар сарын 1-ээс тавдугаар сарын 31-нийг хүртэл хүлээж авна. Хүсэлт хүлээн авсан өдрөөс хойш ажлын 10 хоногт багтаан шийдвэрлэж үнэлгээг дүйцүүлсэн “Батламж хуудас”-ыг цахимаар олгох юм байна.
