Монгол Улсын Боловсролын их сургуулийн Нийгэм, хүмүүнлэгийн ухааны сургуулийн Монгол судлалын хүрээлэнгээс зохион байгуулдаг “Монгол судлалын шинэ эрин” олон улсын эрдэм шинжилгээний хурал энэ сарын 16-17-ны өдрүүдэд Улаанбаатар хотноо болно. Эрдэм шинжилгээний хуралд Монгол Улсаас гадна ОХУ, БНХАУ, АНУ, Япон, Энэтхэг, Казахстан улсын 153 эрдэмтэн судлаач оролцохоор бүртгүүлжээ.

Олон улсын эрдэмтэд монгол судлалын ойр үеийн шинэ судалгааны ололт амжилтаа хэлэлцүүлэх, судалгааны үнэ цэнтэй мэдээлэл солилцох, салбарын хөгжил хувь нэмэр оруулахад “Монгол судлалын шинэ эрин” эрдэм шинжилгээний хурлын зорилго чиглэдэг.   

Эрдэм шинжилгээний хурлаар монгол хэл судлалын, харьцуулсан хэл шинжлэл, утга зохиол, сэтгүүл зүйн олон нийтийн харилцаа, нийгэм улс төр, соёл, Их Монгол Улсын археологи, түүх, соёл гэх зургаан салбар хуралдааны хүрээнд судлаачид 141 эрдэм шинжилгээний бүтээл хэлэлцүүлнэ. Зарим судлаачийн бүтээлийг ханын /постер/ илтгэл хэлбэрээр танилцуулахаар төлөвлөсөн байна.

Мөн энэ жилийн түүхийн салбар хуралдааныг Их Монгол Улс байгуулагдсаны 820 жилийн түүхэн ойд зориулж буй бөгөөд археологи, түүх, соёлын судалгаа сэдвийн хүрээнд зохион байгуулж буйгаараа онцлог ажээ.  

 “Монгол судлалын шинэ эрин VI” олон улсын эрдэм шинжилгээний хурлын хөтөлбөр -ийг хүргэж байна.