Газар ба уур амьсгал дахь залуучуудын манлайллын асуудлаарх сургалт, хэлэлцүүлгийг НҮБ-ын Хөгжлийн хөтөлбөр, Их Британийн Элчин сайдын яам, Шведийн Олон улсын хөгжлийн хамтын ажиллагааны агентлаг (SIDA), YECAP-ийн дэмжлэгтэйгээр их, дээд сургууль, төрийн бус байгууллага, Монголын Улаан загалмай нийгэмлэгийн залуучуудын сайн дурын төлөөллийг хамруулан зохион байгуулжээ.

Эл сургалт нь Цөлжилттэй тэмцэх тухай НҮБ-ын Конвенцын Талуудын 17 дугаар бага хурал буюу COP17-ын талаарх мэдлэг, ойлголтыг нэмэгдүүлэхийн зэрэгцээ Монгол Улсын дэлхийн түвшинд гүйцэтгэж буй манлайллын үүргийг онцлон таниулахад чиглэсэн юм. Мөн COP17-ын хүрээнд зохион байгуулагдах бодлогын үйл явц, нөлөөллийн үйл ажиллагаа, сайн дурын санаачилга, арга хэмжээнд залуучууд оролцох бодит боломжуудыг тодорхойлон харууллаа.

Оролцогчид COP17-ын талаар мэдээлэл авч, санал санаачилгаа хуваалцан, уур амьсгалын үйл ажиллагаанд шаардлагатай ур чадварыг хөгжүүлэх зорилготой “Movers Workshop”-д хамрагдсан. Энэхүү үйл ажиллагаа нь COP17 болон цаашдын шийдвэр гаргах үйл явцад залуучуудын илүү хүчтэй сүлжээ, тогтвортой оролцоог бий болгох шинэ эхлэлийг тавилаа гэж зохион байгуулагчид онцолж байна.

Их, дээд сургууль, төрийн бус байгууллага, орон нутгийн иргэний байгууллагын 40 гаруй залуу төлөөлөл НҮБХХ-ийн бүс нутгийн тэргүүлэх “Climate Movers Workshop” сургалтыг амжилттай дүүргэж, сертификат гардан авчээ.