Өвлийн сар эхлээд удаагүй байгаа ч намрын сүүлчээр нөмөрсөн цас, хөлдсөн мөс эрсдэл, аюултай байдал, зуд турхныг ч дагуулсаар байна. Ирэх өдрүүдэд ч тэнгэр муудна гэдгийг онцгой байдал, цаг уур зэрэг мэргэжлийн байгууллагуудаас анхааруулж, сэрэмжлүүлэг хүргэсээр байгаа юм.

Маргааш буюу энэ сарын 28-нд Завхан, Хөвсгөл, Булган, Сэлэнгэ, Дархан-Уул аймгийн нутгаар цас орж, цасан шуурга шуурна. Мөн Алтайн салбар уулархаг нутаг болон говийн бүс нутгаар салхи шуургатай байхыг анхаарууллаа.

Бямба гараг буюу энэ сарын 29-нд баруун болон зүүн аймгуудын нутгийн хойд хэсэг, төв болон говийн аймгуудын нутгийн зарим газраар цас орж, цасан шуурга шуурна.

Ингээд ч зогсохгүй энэ сарын 30-нд төв болон зүүн аймгуудын нутгийн зарим газар, говийн аймгуудын нутгийн зүүн хэсгээр цас орж, цасан шуурга шуурна гэж мэдээлжээ.

Иймд та эдгээр өдөр холын замд гарах гэж байгаа бол, ойрын зайд зорчих гэж буй бол, отор нүүдэл, эрэл сурал хийхээр зэхэж байгаа бол цаг агаарын байдлыг харж, мэргэжлийн байгууллагууд, онцгой байдлын албаны сэрэмжлүүлгийг сонсоорой.

Цаг агаарын аюулт үзэгдлийн үед иргэд, малчид, тээвэрчид та бүхэн газар орныхоо цаг агаарын мэдээ, мэдээллийг тухай бүрд хүлээн авах, хувийн болон тээврийн хэрэгслийн бэлтгэл, бэлэн байдлыг сайтар хангах, малаа ойрын бэлчээрт бэлчээх, бага насны хүүхэд, өндөр настан, хөгжлийн бэрхшээлтэй иргэдийг малд явуулахгүй байхыг онцгойлон анхааруулж байна.