Хууль зүй дотоод хэргийн яамны Төрийн нарийн бичгийн дарга Н.Мягмар өчигдөр (2025.09.04) Азийн хөгжлийн банкны Зүүн Азийн бүсийн газрын жендэрийн ахлах мэргэжилтэн ноён Жеймс Лан тэргүүтэй төлөөлөгчдийг хүлээн авч уулзжээ.

Уулзалтын үеэр Азийн хөгжлийн банкны дэмжлэгтэйгээр жендэрт суурилсан хүчирхийлэлтэй тэмцэх, урьдчилан сэргийлэх чиглэлээр өнгөрсөн хугацаанд хэрэгжүүлсэн олон төсөл, хөтөлбөрийн үр дүн гарсан төдийгүй энэ төрлийн гэмт хэргийн гаралт буурах нөхцөл бүрдэж байгаад талархал илэрхийлсэн байна.

Азийн хөгжлийн банкны төлөөлөл Жеймс Лан өнгөрсөн онд хийсэн “Эрэгтэйчүүдийн эрүүл мэнд ба амьдралын туршлага” судалгаанд үндэслэн Монгол Улсад жендэрт суурилсан хүчирхийллээс урьдчилан сэргийлэх, хариу арга хэмжээг сайжруулах чиглэлд эхлүүлэх гэж буй дараагийн төслийн талаар танилцуулж, мэдээлэл өгөв. Улмаар талууд энэ удаагийн хэрэгжүүлэх төслийн онцлог болон анхаарах асуудал, хүлээгдэж буй үр дүнгийн талаар санал солилцжээ.

Уулзалтад Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Л.Нямгэрэл, ХЗДХЯ-ны Олон улсын гэрээ, гадаад хамтын ажиллагааны газрын дарга Ч.Нарантуяа, тус яамны Сургалт сурталчилгаа, хөтөлбөрийн хэрэгжилтийн газрын дарга Г.Эрдэнэбулган нарын төлөөлөл байлцав.