Архив, албан хэрэг хөтлөлтийн тухай хуулийн 5 дугаар зүйлийн 5.2.3 -т  заасныг үндэслэн “Төрийн байгууллагын архив, албан хэрэг хөтлөлт, ажлын зохион байгуулалтын үйл ажиллагаанд улсын үзлэг зохион байгуулах тухай” Засгийн газрын 2025 оны 23 дугаар тогтоол батлагдсан. Үүнтэй холбогдуулан улсын үзлэгийг зохион байгуулах Төв комиссын бүрэлдэхүүн, удирдамжийг баталсан билээ.

Тэгвэл “Төрийн байгууллагын архив, албан хэрэг хөтлөлт, ажлын зохион байгуулалтын үйл ажиллагаанд улсын үзлэг зохион байгуулах” Төв комиссын хурал өчигдөр /2025.08.28/ болжээ. Хурлаар өмнөх онуудын улсын үзлэгүүд, түүний үр дүн, 2025 онд улсын үзлэгт хамрагдах байгууллагууд, зохион байгуулах хуваарь, Төрийн байгууллагын архив, албан хэрэг хөтлөлт,  ажлын зохион байгуулалтын шалгуур үзүүлэлт, аргачлалыг танилцуулж, Төв комиссын төлөвлөгөөний төслийг хэлэлцэн батлав.

Монгол Улсад 1970 оноос бичиг хэргийн хөтлөлт, архивын ажилд улсын үзлэг явуулж байхаар шийдвэрлэж, 1984, 1990, 1995, 2000 онд төрийн архивын үйл ажиллагаанд, 2004, 2009, 2015, 2019 онуудад байгууллагын архив, албан хэрэг хөтлөлт, төрийн байгууллагын ажлын зохион байгуулалтад улсын үзлэг явуулсан.  Эдгээр үзлэгийн үр дүнд улсын хэмжээнд архив, албан хэрэг хөтлөлтийн ажил жигд сайжирч, тодорхой үр дүнд хүрсэн гэж үздэг.

Архив, албан хэрэг хөтлөлтийн тухай хуулийн шинэчилсэн найруулгыг 2020 оны дөрөвдүгээр сарын 24-ний өдөр батлуулж, мөн оны 12 дугаар сарын нэгний өдрөөс мөрдөж эхэлсэн. Уг хуулийн хэрэгжилтийг хангах хүрээнд 21 журам, заавар, стандарт, шинээр болон шинэчлэн батлагдан мөрдөгдөж байна.

Мөн Нийтийн мэдээллийн ил тод байдлын тухай хууль 2021 онд, Цахим гарын үсгийн тухай хууль 2022 онд тус тус батлагдан мөрдөгдөж, шинээр батлагдсан хууль, журам, стандартын хэрэгжилт улсын хэмжээнд ямар түвшинд байгааг тогтоох зайлшгүй шаардлага үүссэн тул 2019 оноос хойш явагдаагүй байсан улсын үзлэгийг ийнхүү зохион байгуулах гэж буй юм.