Дэлхий даяар тавдугаар сарын 8-ны өдрийг Олон улсын Улаан загалмай, Улаан хавирган сар хөдөлгөөний өдөр болгон тэмдэглэж, хүмүүнлэгийн үзэл санааг түгээн дэлгэрүүлэх, сурталчлах, Улаан загалмайн ажилчид, сайн дурынхан, гишүүд дэмжигчдэд талархал илэрхийлэх өдөр болгон зохион байгуулдаг уламжлалтай.

Эл үйл ажиллагаа 1948 оноос эхлэлтэй бөгөөд Монгол Улсын Засгийн газраас 2011 онд жил бүрийн тавдугаар сарын 8-ныг "Монголын Хүмүүнлэгийн өдөр" болгох шийдвэр гаргаснаар манай улс 14 дэх жилдээ тэмдэглэн өнгөрүүлэх гэж байна.

Энэ жил “Энэрэнгүй үйлсийн талд” уриа дор тэмдэглэж, орон даяар Улаан загалмайн хороодоор дамжуулан олон нийт, хүүхэд залуусын дунд хүмүүнлэгийн үйлсийг сурталчлан ажиллах аж. Хүмүүнлэгийн өдрийг Олон улсын Улаан Загалмай ба Улаан хавирган сар нийгэмлэгүүдийн холбоо, Олон улсын Улаан Загалмай хороо болон Үндэсний нийгэмлэгүүд, НҮБ-ын төрөлжсөн байгууллагууд, хандивлагчид тэмдэглэн өнгөрүүлдэг юм.