Монгол Улсад генерал цол бий болсны 81 жилийн ой, “Монгол генералын өдөр” өнөөдөр тохиож байна. Генерал цол, цолтны тухай 10 баримтыг хүргэж байна. 

1. Генерал цолыг анх XVI зууны үед Францад олгож байжээ. Одоогоор дэлхийн 200 гаруй улсын цэрэг, тусгай салбарт энэ цолыг хэрэглэж байна. 

2. Монгол Улсад анх 1944 онд бий болсон. Тодруулбал, БНМАУ-ын Ардын сайд нарын зөвлөлийн 52 дугаар тогтоолоор цэргийн удирдах дээд албан тушаалын генерал хэмээх цэргийн дээд цолыг олгож эхэлсэн түүхтэй. 1944 оны дөрөвдүгээр сарын 28-ны өдөр Улсын бага хурлын тогтоолоор онцгой гавьяа байгуулсан цэргийн дээд дарга нарт олгоно гэж тогтоож анх 11 хүнд генерал цол олгож байжээ. 

3. 1944 оны дөрөвдүгээр сарын 28-нд Ю.Цэдэнбал, Ж.Лхагвасүрэн нарт дэслэгч генерал цол, С.Балдан, Д.Дамдинхүү,  С.Равдан, Б.Дорж, Г.Дагдан, Б.Шагдаржав, Г.Рэндоо, М.Зайсанов, Р.Осор нарт хошууч генерал цол олгож байв. 

4. Манай улсад 81 жилийн хугацаанд 230 генерал цолтон төржээ. Тухайлбал, маршал цолыг нэг, армийн генерал нэг, хурандаа генерал цолыг найм, дэслэгч генерал цолыг 22, хошууч генерал цолыг 124, бригадын генерал цолыг 74 хүнд олгосон байна.

5. Монгол Улсын генерал цолтнуудын дунд шинжлэх ухааны доктор зэрэгтэй ес, боловсролын доктор зэрэгтэй 36 хүн байдаг. 

6. Монгол Улсын 45 генерал цолтон дипломат албанд хүчин зүтгэж, тэдний дундаас онц бөгөөд бүрэн эрхт элчин сайдаар 14 хүн ажиллаж байжээ. 

7. Монгол Улсад генерал цолтой Улсын баатар цолтон зургаа, Хөдөлмөрийн баатар шагналтан гурав, гавьяат цолтон 20 хүн байна. 

8. Монгол Улсын 230 генерал цолтны 129 нь өдгөө амьд сэрүүн байгаа бөгөөд 101 настай хурандаа генерал С.Лувсангомбо хамгийн өндөр нас сүүдрийг зооглоод байна. Харин хамгийн залуу нь 45 настай бригадын генерал О.Амарсанаа ажээ. 

9. Хамгийн залуу насандаа генерал цол хүртэж байсан эрхэм Ю.Цэдэнбал бөгөөд тэрбээр 28 насандаа дэслэгч генерал болж байжээ. 

10. Генерал цолыг 1944 оноос 1990 он хүртэл Сайд нарын зөвлөлөөс олгодог байсан бол өдгөө Монгол Улсын Ерөнхийлөгчийн зарлигаар цолыг олгож байгаа юм. 

Б.Лувсанпэрэнлэй