Өмнөговь аймагт байрлан үйл ажиллагаа явуулдаг уул уурхайн компаниудад өнгөрсөн сарын 17-ноос хойш хоол хүнстэй холбоотой халдварын гурван удаагийн дэгдэлт бүртгэгдсэн гэж Халдварт өвчин судлалын үндэсний төвөөс мэдээллээ. 

Халдварын сүүлийн дэгдэлт энэ сарын 8-нд бүртгэгдсэн бөгөөд Өмнөговь аймгийн Цогтцэций суманд байрлах гурван компанийн 800 гаруй уурхайн ажилтан өртжээ.

Өнөөдрийн байдлаар ХӨСҮТ-ийн халдвартын клиникт 119 тохиолдол, гэрээр 40, аймаг орон нутагт 16 тохиолдол тусгаарлагдан эмнэлгийн тусламж авч байгаа аж.

Мөн өнөөдөр Өмнөговь аймгийн Гурвантэс суманд байрлах уурхайгаас хоол хүнсний гаралтай халдварын сэжигтэй 77 тохиолдол ХӨСҮТ-ийн Гэдэсний халдварын тасагт эмнэлгийн тусламж авахаар зөөвлөрлөгдөн иржээ. Урьдчилсан байдлаар хоол хүнсний гаралтай халдварын сэжигтэй тохиолдлын дэгдэлт тул үргэлжлэн тандалт судалгаа, лабораторийн шинжилгээ хийгдэж байгаа гэлээ. 

Халдварын дэгдэлт бүртгэгдсэн уул уурхайн компаниудад энэ сарын 8-наас ХӨСҮТ-ийн эмнэлзүй, тандалтын мэргэжлийн баг, аймгийн Эрүүл мэндийн газар, салбарын хяналтын мэргэжилтнүүдтэй ажиллаж буй юм байна. 

Б.Лувсанпэрэнлэй