“Улаанбаатар марафон” олон улсын гүйлт ирэх сарын 24-ний өдөр болно гэж нийслэлийн Биеийн тамир, спортын газраас мэдээллээ. Гүйлтийн бүртгэл өнөөдрөөс эхлэн ирэх сарын 20-ныг хүртэл үргэлжлэх бөгөөд оролцох хүсэлтэй хувь хүн, албан байгууллага, гадаадын иргэд https://ulaanbaatar.marathon.mn/ цахим хуудсаар болон Hipay аппликейшнаар бүртгүүлж онлайнаар хураамжаа төлөх боломжтой аж. Гүйлтийн төрлүүд өмнөх жилтэй адил 500 метрээс 42 км хүртэл байна. 

Бүртгэлийн хураамжийг танилцуулбал,

1,5 км-т 5.000 төгрөг (гэр бүлийн төрөлд оролцогч гишүүн тус бүр 5.000 төгрөг)

Таван км-т 10.000 төгрөг

10 км-т 50.000 

21 км-т 70.000 

42 км-т 90.000 төгрөг байна. 

Ойрын зай буюу таван км-ийн зайд оролцогчид энгэрийн дугаараа ирэх сарын 1-20-ны хооронд 17:00 цаг хүртэл нийслэлийн Биеийн тамир, спортын газар болон харьяа дүүргийн Биеийн тамир, спортын хорооноос авах юм. 

Харин 42 км, 21 км, 10 км-ийн зайд оролцогчдын энгэрийн дугаар, чип, футболк, мөн 1.5 км зайд оролцогчдын баталгаажуулалт, энгэрийн дугаар олгох ажлыг нийслэлийн Биеийн тамир, спортын газар, 500, 800 м-ийн гүйлтийн бүртгэлийг Монголын тусгай олимпын хороо хариуцан олгох бөгөөд хугацаагаа удахгүй мэдэгдэнэ гэлээ. 

“Улаанбаатар марафон”-д оролцсон хүн бүр “Батламж”-аа https://ulaanbaatar.marathon.mn/ цахим хаягаас хэвлэн авах юм байна. Мөн 42, 21, 10 км-ийн гүйлтэд оролцогчдын амжилтыг энэхүү цахим хаягт байршуулах аж. “Улаанбаатар марафон” гүйлтэд өнгөрсөн онд гадаад, дотоодын 30 мянга гаруй хүн оролцжээ.

Б.Лувсанпэрэнлэй