Дэлхийн эмч нарын өдөр тохиож байна. Эл өдрийг анх 1933 оны энэ өдөр АНУ-ын Жоржиа мужид тэмдэглэж эхэлсэн байдаг. Харин 1958 оны гуравдугаар сарын 30-д албан ёсоор “Үндэсний эмч нарын өдөр”-ийг тэмдэглэх тогтоол баталсан түүхтэй аж.  

Түүхийг товч тодруулбал, 1842 оны гуравдугаар сарын 30-ны өдөр Кроуфорд В.Лонг гэдэг эмч мэс заслын ерөнхий унтуулгад эфир ашиглан мэдээгүйжүүлж хагалгаа хийж байжээ. Энэхүү үйл явдлаас хойш 91 жилийн дараа буюу 1933 оны эл өдөр Чарльз Браун Алмонд хэмээх эмчийн эхнэр Эудора Браун Алмонд эмч нарт талархах өдрийг үндэсний хэмжээнд тэмдэглэхийг хүсэж, санаачилга гаргасан байна. Тэрбээр орон нутгийн бүх эмч нар болон тэдний эхнэрүүд рүү шуудангаар мэндчилгээ дэвшүүлж, Кроуфорд В.Лонг болон бусад эмч нарын булшинд улаан лиш цэцэг өргөж хүндэтгэл үзүүлжээ.

Түүний санаачилга олон жилийн уламжлал болон үргэлжилсээр 25 жилийн дараа албан ёсны өдөр болж батлагдсан байдаг. Улаан лиш цэцэг ч мөн эмч нарт талархал илэрхийлэх бэлгэдэл болжээ.  

Энэ өдрийг АНУ болон дэлхийн олон оронд Эмч нарын өдөр гэж тэмдэглэдэг. Монгол Улс ч тэдгээрийн нэг юм. Харин Испани, Куба, Аргентин, Энэтхэг зэрэг улсад “Эмч нарын өдөр” нь ялгаатай байдаг аж.