Халдвар өвчин судлалын, үндэсний төвөөс өнөөдөр менингоккокт халдварын нөхцөл байдлын талаар мэдээлэл өглөө. 

ХӨСҮТ-ийн ерөнхий захирал Э.Анхбаяр “Он гарсаар менингоккокт халдварын дөрвөн тохиолдол батлагдлаа. Хамгийн сүүлд Архангай аймгийн Цэнхэр суманд менингоккокт халдварын тохиолдол бүртгэгдэж, таван настай хүүхэд эндсэн. 

Тухайн хүүхдийн бие маш хүнд, амь тэмцсэн байдалтай аймгийн төвийн эмнэлэгт ирсэн. Улмаар аймгийн нэгдсэн эмнэлгийн халдвартын тасагт шилжүүлж, шаардлагатай эмчилгээг цаг алдалгүй хийсэн боловч биеийн байдал маш хүнд байсан учраас харамсалтайгаар нас барлаа.

Монгол Улсад тууралтат халдварын улирал үргэлжилж байна. Тиймээс халуурсан, тууралт гарсан шинж тэмдэгтэй хүүхдээ яаралтай эрүүл мэндийн байгууллагад үзүүлэхийг эцэг, эхчүүдэд анхааруулж байна. Менингоккокт халдвараар нас барсан хоёр тохиолдол цаг алдаж, эмнэлгийн тусламж үйлчилгээ авснаас болсон. Тиймээс халуурсан шинж тэмдэг илэрсэн бол тууралт гарахаас нь өмнө эмнэлэгт хандах хэрэгтэй гэдгийг дахин хэлье. Менингококкт халдварын үед огцом өндөр хэмээр халуурах бөгөөд тууралт гарах нь хүндэрснийг илтгэнэ” гэлээ. 

Хүүхдэд халуурах, толгой өвдөх, гэрэлд мэдрэг болох, бөөлжих, хоолонд дургүй болох зэрэг шинж тэмдэг илэрвэл яаралтай эмнэлгийн байгууллагад хандахыг зөвлөлөө.

Улаанбурхан өвчний нөхцөл байдлын мэдээ

Өнөөдрийн байдлаар улаанбурхан өвчний батлагдсан 114 тохиолдол, сэжигтэй 123, эдгэрсэн 32 тохиолдол бүртгэгдээд байгаа юм. Сүүлийн үед улаанбурхан, салхин цэцэг, хоолны хордлого ихээр бүртгэгдэж байгаа ажээ. 

 ХӨСҮТ-ийн Тандалтын албаны их эмч Н.Сувдмаа

ХӨСҮТ-ийн Тандалтын албаны их эмч Н.Сувдмаа “Улаанбурхан өвчний хавьталд орсон 7220 хүнийг хяналтад авч, ажиглалт хийж байна. Анх хоёрдугаар сарын 14-нд бүртгэгдсэн зөөвөрлөгдсөн тохиолдлоос хойш сүүлийн 14 хоногт улаанбурхан өвчний халдвар огцом нэмэгдсэн. Тухайлбал, Улаанбаатар хот, Дундговь, Өмнөговь аймгуудад хамгийн ихээр бүртгэгдэж, тохиолдлын тоо буурахгүй байна. Батлагдсан тохиолдлыг насны хувьд авч үзвэл 10-14 насныхан илүүтэй өвчилж байна. Тийм учраас бид ерөнхий боловсролын сургуулийн нийгмийн ажилтнуудаар дамжуулж, эцэг эхчүүдтэй холбогдож хүүхэд нь товлолт вакцин хийлгэсэн эсэх мэдээллийг нягталж байна” хэмээлээ. 

Б.Лувсанпэрэнлэй