Хөвсгөл аймгийн Алаг-Эрдэнэ сумын зургадугаар багийн нутаг Хатгал тосгоны “Хирвэстийн-ам” гэдэг газар нуурын мөсөн дээгүүр зорчиж явсан суудлын автомашин мөс цөмөрсний улмаас ч живжээ. 

Зорчигчид Ханх сумаас Хатгал тосгоны чиглэлд явж байжээ. Эл дуудлага өчигдөр өглөөний 06 цаг 40 минутад аймгийн Онцгой байдлын газрын 69 дүгээр ангид ирж алба хаагчид газар дээр нь очиж ажилласан байна. 

Аврах ангийн алба  хаагчдыг очиход “HONDA CR-V” загварын суудлын автомашин Хөвсгөл нуурын баруун эргээс 20 метрийн зайтай живсэн байсныг таван цаг ажиллан татан гаргаж, иргэн Г-д хүлээлгэн өгсөн гэж Онцгой байдлын ерөнхий газраас мэдээллээ. 

Иймд иргэд, жолооч, тээвэрчдийг зам товчилж мөсөн дээгүүр зорчихгүй байхыг онцгойлон сэрэмжлүүлж байна. 

Б.Лувсанпэрэнлэй