Монголын үндэсний бөхийн холбоо, “Бест буйдан” компанитай хамтран зохион байгуулдаг “Алтан базер” чансаа өндөр 64 бөхийн барилдаанд зодоглох бөхчүүдийн нэр тодорлоо. Өнгөрсөн жил анх удаа зохион байгуулсан тус барилдаан бөхчүүд учраа бөхөө сугалаагаар сонгодгоороо онцлогтой. 

Барилдаанд улсын арслан Ц.Бямба-Отгон, Р.Пүрэвдагва тэргүүтэй улс, аймаг, цэрэг, сумын цолтой 64 бөх барилдана. Тодруулбал, улсын арслан хоёр, заан тав, харцага найм, начин 21, аймгийн хурц арслан долоо, аймаг, цэргийн арслан 14, заан гурав, харцага хоёр, начин хоёр, сумын заан цолтой нэг бөх багтжээ. 

Энэхүү барилдаанд түрүүлсэн бөх 20 сая төгрөгийн бай шагнал гардах бол үзүүрлэсэн нь 10 саяын эзэн болно. Харин их шөвөгт шалгарсан бөхчүүд таван сая төгрөгийн мөнгөн шагнал хүртэх юм. Түүнчлэн уран мэх хийсэн бөхийг нэг сая төгрөгөөр урамшуулахаас гадна 1-3 давсан бөх 200-400 мянган төгрөгийн давааны бай авах ажээ. 

Барилдаан маргааш 15:00 цагт Монгол бөхийн өргөөнд эхлэх бөгөөд NTV телевиз албан ёсны эрхтэйгээр шууд дамжуулах юм байна. 

Б.Лувсанпэрэнлэй