"Эрхтэн шилжүүлэн суулгуулагсдын холбоо" ТББ-ын гишүүд өнөөдөр мэдээлэл хийлээ.
Тус холбооны УЗ-ийн гишүүн М.Өлзийбаяр “Манай улсад бөөр орлуулах шаардлагатай 2890 хүн бий. Энэ талын мэс заслын эрэлт жилээс жилд нэмэгдсэн. 30 жилийн турш манай эмч нар эрхтэн шилжүүлэх хагалгааг хийж байна. Хамгийн анх 1996 онд энэ хагалгааг хийсэн. Энэ хагалгаа нь дархлаа судлаач, мэс заслын эмч, сэтгэл зүйч гээд олон хүн багаараа ажилладаг онцлогтой. Манай улс энэ төрлийн хагалгааг улам сайн хөгжүүлэх шаардлага бий. Нас барсан хүн бүр донор болох мэтээр буруу ойлгоод байна. Тархины үхжилтэй, цусны бүлэг таарсан гэх мэт шалгуурууд бий. Манай улсад хуулийг дутуу боловсруулсан тул өнөөдөр бид энэ асуудлаар хоёр хуваагдлаа. Харин өндөр хөгжилтэй орнуудад жолооч болоход нь “Та донор болох уу” гэж асуудаг юм байна. Иргэн 18 нас хүрэнгүүт мөн энэ асуултыг асуудаг хуультай улс ч бий. Эдгээр улсад донор олон тул өвчтөнүүд нь удаан хүлээдэггүй” гэлээ.
Мөн тус холбооны гишүүд П.Батчулуун эмчийн асуудлаар байр сууриа илэрхийллээ. Тэд “П.Батчулуун эмчийг зарим нь өмөөрч, зарим нь шүүмжилж байна. Тархины үхэлтэй донорын ар гэрийнхэнд маш их баярлаж явдаг. Тэдний шийдвэрээр хэд хэдэн хүн амь аврагджээ. Энэ их буянтай үйл юм. Гэхдээ эмчийг ч буруутгамааргүй байна. Эрхтэн шилжүүлэх мэс заслыг манай эмч нар их сайн хийдэг болсон. Бид эмчээ аврах гээд гарын үсэг цуглуулж, гадуур хөөцөлдөж байна. Бид донор хүлээж байсан тул энэ зовлонг их сайн мэднэ. Донороо хүлээж буй олон хүнд өвчтөн байдаг. Та нар эмнэлэгт очоод байдлыг хараарай” гэлээ.
Б.Лувсанпэрэнлэй
