Дэлхийн цирк монголд тоглолт 13 дахь жилдээ болох гэж байна. Ирэх сарын 12-ноос эхлэн тавдугаар сарын 11-ийг хүртэл зөвхөн бямба, ням гарагт 11:00 болон 15:00 цагаас “Степпе арена”-д тоглохоор төлөвлөжээ. Зохион байгуулагчид нь өнөөдөр хэвлэлийн бага хурал хийлээ.

Энэ удаагийн тоглолтод дэлхийн алдарт алиалагч Дэвид Ларибле ирж оролцох юм байна. Тэрбээр, түүний үзүүлбэрээ толилуулах Азийн анхны орон нь Монгол Улс болно гэдгийг зохион байгуулагчид онцоллоо. 

“AIC Steppe Arena”-ын ерөнхий менежер Ц.Энхбаяр “Монгол, Америк, Герман, Итали, Аргентин, Колумб, Орос, Иран, Беларусь, Украйн, Убекстан, Казахстан зэрэг 15 орны олон улсад нэр хүндтэй циркийн жүжигчид болон сургуультай амьтад циркийн үзүүлбэрийг үзүүлнэ. Мөн циркийн хаан үзүүлбэр “Агаарын нисэлт”, амь эрссэн мото шоу, есөн метр өндөр дугуйн дээрх үзүүлбэр, агаарын цагариг, сургуультай нохойнууд зэрэг олон улсын шилдгүүд тоглоно” гэв.  

Тоглолтыг 0-4 насны хүүхэд үнэ төлбөргүй үзэх боломжтой бол таваас дээш насныхан суудлын байршлаас хамаарч 20-100 мянган төгрөгийн тасалбар худалдан авч үзэхээр зохион байгуулжээ.

Б.Лувсанпэрэнлэй