Цэрэг татлагын ажилтай холбогдуулан Батлан хамгаалах яамнаас хугацаат цэргийн албаны цэрэг татлагын бэлтгэл ажлыг хангах хүрээнд “Цэрэг татлага 2025” зөвлөгөөнийг зохион байгууллаа. Зөвлөгөөнөөр цэргийн албаны нэгдүгээр ээлжийн цэрэг татлага тавдугаар сарын 1-15-нд зохион байгуулахаар болжээ. 

Мөн хугацаат цэрэг татлагын зохион байгуулалтыг сайжруулах, Засгийн газраас тогтоосон хяналтын тоонд хүргэх, цэргийн насны залуучуудын эрүүл мэндийн байдал, цэрэг татлагын үеийн эрүүл мэндийн үзлэгт анхаарах зэрэг чухал асуудлаар хэлэлцүүлэг өрнүүлжээ.

Эрүүл мэндийн байгууллагаас гаргасан судалгаагаар цэргийн насны залуусын дунд архи согтууруулах ундаа, тамхины хэрэглээ бусад насныхантай харьцуулахад хамгийн өндөр гарсан байна. 

Цэргийн насны залуусын дунд зүрх судасны эмгэг, мэс, гэмтлийн эмгэг, арьсны эмгэг, шүд, эрүү нүүрний эмгэг, сэтгэцийн эмгэг их байгаа нь цэргийн албанд тэнцэхгүй байх суурь шалтгаан болж байгааг онцолжээ. Иймд Батлан хамгаалах салбар цэргийн насны залуусын эрүүл мэндийн үзлэгийг чанаржуулж, цэрэг татлагын зохион байгуулалтыг сайжруулах тал дээр онцгой анхаарал хандуулан ажиллахаа илэрхийллээ. 

Б.Лувсанпэрэнлэй