Жил бүрийн гуравдугаар сарын дөрөв дэх долоо хоногийн пүрэв гарагт зарлан мэдээллийн дуут дохиогоор ажилладаг уламжлалтай. Үүний дагуу өнөөдөр 16:00 цагт орон даяар гамшгийн аюулын дуут дохио дуугарна гэж Онцгой байдлын ерөнхий газраас мэдээллээ.  

Зарлан мэдээллийн дохиогоор ажиллах үед иргэд юу хийх, мэдэх ёстой тухай зөвлөмж, удирдамжийг онцгой байдлын байгууллагаас өгснийг хүргэж байна. Эхний дохио дуугарахад “суу, нүүгд, хүлээ” гэсэн дүрмийг баримталж, аюулгүй байдлаа хангаж түр хүлээнэ. Хэрэв гудамжинд явж байвал, гэрэлтүүлэг, цахилгааны тулгуур багана, өндөр барилга, байгууламж зэргээс холдож биеэ хамгаалах бөгөөд тээврийн хэрэгслээр явж байгаа тохиолдолд замаас гарч, тээврийн хэрэгслийг унтрааж түр хүлээх ёстой. 

Хоёр дахь дохио дуугарахад яарч сандралгүй нэгийн цуваанд орж баруун гар талаа барьж, “гүйхгүй, эргэж буцахгүй, нэгнээ түлхэхгүй” гэсэн дүрмээ баримталж, байгаа газраасаа гарч, аюулгүй талбайд цугларна. Гарахдаа цахилгаан шат ашиглахгүй. 

Гурав дахь дохио дуугарахад өөрийн харьяаллын засаг захиргааны нэгж болон байгууллагынхаа холбогдох албан тушаалтанд бүртгүүлж, дадлага, сургуульдаа идэвхтэй оролцохыг уриаллаа. 

Б.Лувсанпэрэнлэй