Сагсан бөмбөгийн үндэсний дээд лигийн плэй-оффын хагас шигшээ шатанд “Хасын хүлгүүд”, “Сэлэнгэ бодонс” багийн цувралын харьцаа 1:1 болсон. Өнгөрөгч бямба гарагт болсон тус тоглолтод “Сэлэнгэ бодонс” баг 97:83 харьцаагаар илүүрхэж плэй-оффын анхны хожлоо авсан юм. Тухайн тоглолтод “Хасын хүлгүүд"-ийн холбон тоглогч Б.Барсболд эсрэг багийн тамирчин Н.Батбаярыг түлхэж, шүүгчээс техникийн алдаа авч, талбайг орхисон. Мөн "Сэлэнгэ Бодонс" багийн импорт тоглогч Ахмад Гилбертэд доромж үг хэлсэн гэж МСБХ-ны мэргэжлийн зөвлөл болон ажлын хэсэг дүгнэжээ. 

Тэрчлэн “Хасын хүлгүүд"-ийн хамгаалагч Б.Саруул-Эрдэнэ эсрэг багийн тоглогч Б.Бишрэлтийн биед халдаж, гэмтээж болохуйц спортын бус алдаа гаргасан гэж үзсэн байна. 

Дээрх зөрчилд МСБХ-ноос Б.Саруул-Эрдэнэд гурван зуун мянган төгрөг, Б.Барсболдыг нэг тоглолт өнжих болон таван зуун мянган төгрөгийн торгууль оногдуулсан байна. Мөн "Хасын хүлэгүүд" багт гурван сая төгрөгийн торгууль ноогдуулжээ. Уг торгуулиудыг дараагийн тоглолтын өмнө "Сэлэнгэ Бодонс" багт төлж барагдуулаагүй тохиолдолд тэмцээнд оруулахгүй гэж шийтгэлийн хуудастаа тодотгожээ.

Б.Барсболд, Б.Саруул-Эрдэнэ нар энэ онд Монгол Улсын шигшээ багт дуудагдсан тамирчид юм. 

Б.Лувсанпэрэнлэй