Цаг уур, орчны шинжилгээний газраас мэдээлснээр өнөөдрөөс эхлэн баруун аймгуудын нутгаар цаг агаарын аюултай үзэгдэл болж, шороон болон цасан шуурга шуурна. 

Өнөөдөр Говь-Алтай, Баянхонгорын өмнөд хэсгээр салхи секундэд 25-28 м/сек зарим үед 34 метрийг давж хүчтэй салхи, шороон шуурганы гамшигт үзэгдэл ажиглагдана. Бусад нутгаар буюу Өвөрхангай, Говь-Алтай, Баянхонгор, Ховд, Архангайн өмнөд хэсгээр Өмнөговийн нутгаар салхи секундэд 18-20 м/сек, зарим үед 28 м/сек давж шороон шуурганы аюулт үзэгдэл ажиглагдана гэж мэргэжлийн байгууллагаас мэдээлж байна.

Мөн Завхан аймгийн нутгаар цасан шуурга болох төлөвтэй байгаа бол энэ үзэгдэл зүүн аймаг руу чиглэхээр хүчтэй салхины эрч багасаж, орох хур тунадасны хэмжээ нэмэгдэнэ. Дорноговь, Сүхбаатар, Дорнодын өмнөд хэсгээр ахиу хэмжээний нойтон цас орох тул тус чиглэлд зорчих хүмүүс бэлтгэлтэй, болгоомжтой байхыг анхааруулж байна. 

Маргааш буюу энэ сарын 26-ны өдөр Сэлэнгэ, Төв аймгийн зүүн хэсгээр, Хэнтий, Дорнод, Дорноговь Төв аймагт ахиу хэмжээний нойтон цас орж, хүчтэй цасан шуурганы аюулт үзэгдэл болох нөхцөл байдал үүссэн. Үүний улмаас өмнөх өдрүүдийн цаг агаараас 15 хэмээр эрс хүйтрэх төлөвтэйг иргэд, малчид, тээвэрчдэд анхааруулж байна. 

Б.Лувсанпэрэнлэй