Гавьяат эмч П.Батчулуун тархины үхэлтэй донороос эрхтэн шилжүүлж суулгахдаа донорын гэр бүлээс зөвшөөрөл авалгүйгээр зарим эрхтнийг авсан хэрэгт буруутгагдаад буй. Тус хэрэг явдлын донор буюу талийгаач А-н ээж Д.Алтантуяа өнөөдөр хэвлэлийн бага хурал зарлаж мэдээлэл хийлээ. 

Д.Алтантуяа “Миний талийгаач охин болон ар гэрийнхнийг олон нийтийн сүлжээгээр буруутан болгож байгаа учраас сэтгэл өвдөөд мэдээлэл хийж байна. Ард иргэдэд энэ хэргийн талаар үнэн зөв мэдээлэл өгөхийг хүссэн юм. Миний охин 2023 оны наймдугаар сарын 5-6-нд  шилжих шөнө авто осолд орж ГССҮТ-д хүргэгдэн очсон. Биднийг өглөө эмнэлэг дээр ирэхэд тархины үхжилттэй гээд хагалгаа хийчихсэн байсан. Дараа өдөр нь эмч нар "Охиноо тархины үхэлтэй донор болгох уу" гэсэн. Тиймээс П.Батчулуун эмчтэй уулзаад түмэнд буян больё гэдэг үүднээс охиныхоо хоёр бөөр, элгийг хандивлахыг зөвшөөрсөн. Анх талийгаачийн элэг, бөөрийг авна гэж зөвшөөрүүлсэн. Дараа нь "Ганц нэг судсыг нь авна шүү" гэж эмч хэлсэн. Талийгаачийн хөлийн судас шөрмөс, тойгийн яс гээд бүгдийг нь авах байсан бол анхнаасаа зөвшөөрөхгүй байсан” гэж ярилаа. 

Мөн бид эмч нараас мөнгө төгрөг нэхээгүй. Яагаад олон нийтийн сүлжээгээр нэг талын мэдээлэл цацаж биднийг зовоогоод байгаа юм бэ. Миний охин ажилд ороод зургаа, долоон сар л болж байсан учир Нийгмийн даатгалын газраас асуухад донорын нөхөн олговор болох 3.5 сая төгрөгийг өгөх боломжгүй гэсэн. Тэглээ гээд бид хэнээс ч мөнгө нэхээгүй. Гэтэл зарим нь талийгаачийн ар гэрийг их мөнгө төгрөг авсан мэтээр мэдээлж байна. Хэргийг задлахыг хүсэж байгаа бол бэлэн байна. Гэхдээ миний охины тухай дахин ингэж мэдээлэхгүй байхыг хүсэж байна гэсэн юм. 

Тэрбээр хэвлэлийн бага хуралд талийгаачийн хүүхдүүдийг дагуулж ирсэн байв. 

Б.Лувсанпэрэнлэй