Олон нийтийн сүлжээнд өчигдөр /2025.03.23/ нэгэн иргэн өөрийн фэйсбүүк хуудсаараа дамжуулан "Цахим мөрийтэй тоглоомыг зохион байгуулахад цагдаагийн байгууллагын алба хаагчид авилгал авч, үйл ажиллагааг нь хэвийн явуулах нөхцөл байдлаар хангаж, хамтарч ажилладаг” тухай мэдээлэл хийсэн. Тэгвэл тус  мэдээлэлтэй холбогдуулан цагдаагийн байгууллагаас өнөөдөр тайлбар мэдээлэл хийлээ.  

Эрүүгийн цагдаагийн албаны Кибер гэмт хэрэгтэй тэмцэх газрын дарга, цагдаагийн хурандаа С.Тайван “Сүүлийн дөрвөн жилд цахим мөрийтэй тоглоомтой холбоотой нийт 1360 хэрэг бүртгэлд цагдаагийн байгууллагаас мөрдөн шалгах ажил явуулсан. Эдгээрээс 299 хэргийг шүүхээр эцэслэн шийдвэрлэсэн байна. Энэ төрлийн гэмт хэрэг нь зохион байгуулалттай, олон хүний бүрэлдэхүүнтэй үйлдэгддэг. Үндэстэн дамнасан зохион байгуулалттай гэмт хэрэг гэж тодотгодог.

Энэ ч утгаараа Монгол Улсын иргэд сүүлийн жилүүдэд гадаад улсаас цахим мөрийтэй тоглоомын гэмт хэргийг бүлэглэн үйлдэх болсон. Цагдаагийн байгууллагаас “шувуу” ажиллагааны хүрээнд Э-гийн нэр бүхий 35 хүний бүлэглэлийг тогтоон, Монгол Улсад авч ирсэн.

Мөн Г-ийн толгойлсон 28 хүний бүрэлдэхүүнтэй бүлгийг мөрдөн шалгаж байна. Тус бүлэглэлийн хоёр этгээд цагдан хоригдож шалгагдаж байгаа. Энэ төрлийн гэмт хэрэг үйлддэг Б-гийн бүлэглэл буюу өчигдөр цахим хуудаст мэдээлэл хийсэн А.Баяржаргал нарын 18 хүн бий. Өчигдөр цахим хуудаст мэдээлэл хийсэн иргэний төрсөн хоёр дүүг шүүгчийн захирамжаар цагдан хорьсон. Мөрийтэй тоглоом зохион байгуулах, мөнгө угаах, гэмт бүлэг байгуулах зэрэг гурван зүйл ангиар шалгагдаж байгаа. Сошиалд мэдээлэл хийсэн А.Баяржаргал гэх этгээдийн мэдээлэлд дурдсан цагдаагийн алба хаагч хэмээх хүний тухайд 2010-2019 онд цагдаагийн байгууллагад ажиллаж байсан иргэн. Тухайн этгээдийг саатуулж, мөрдөн шалгах ажиллагааг үргэлжлүүлж байна” гэлээ. 

ЦЕГ-ын Дотоод хяналт, шалгалт хариуцсан дэд дарга, цагдаагийн хурандаа Н.Мөнхзул “Ноорог.мн” сайтын ажилтан А.Очбаярын ах иргэн А.Баяржавхлан нь өчигдөр цахим сүлжээнд цагдаагийн алба хаагчтай холбоотой байж болзошгүй ноцтой хэргийн талаар дурдсан. Тухайлбал, иргэн А.Баяржавхлан өөрсдөд нь ажилладаг гэх цагдаагийн алба хаагч шуурхай хуралдааны мэдээллийг өөр рүү нь явуулсан мэтээр мэдэгдэл хийсэн. Энэ асуудлаар ажлын хэсэг гаргаж, дотоод хяналт, шалгалтын ажлыг эхлүүлсэн. Урьдчилсан байдлаар иргэн А.Баяржавхлан мэдэгдлийнхээ үеэр сонсгосон бичлэг нь цагдаагийн байгууллагаас өнгөрсөн оны есдүгээр сард зохион байгуулсан “Хянамгай бай” гэдэг хэвлэлийн бага хурлыг мэдээлэл болох нь тогтоогдсон. Хэрэв цахим сүлжээнд мэдэгдэл хийсэн иргэн А.Баяржавхланд алба хаагчдын хууль бус үйлдлийн тухай мэдээлэл байвал бидэнд мэдэгдэж болно. Цагдаагийн байгууллага хууль бус үйлдэл, зөрчил, гэмт хэрэг хийсэн алба хаагчтай эвлэрэхгүй, шалгаж тогтоож, хуулийн хариуцлага хүлээлгэнэ. Гэхдээ алба хаагчтайгаа холбоотой хяналт, шалгалт хийсний дараа тухайн алба хаагч буруугүй нь тогтоогдвол хуулийн хүрээнд эрхийг нь хамгаална” хэмээлээ. 

Б.Лувсанпэрэнлэй