"Ноорог" медиагийн ажлын байранд нэгжлэг хийж, ажилчдыг нь цагдаагийн байгууллагын байршилд авч ирэн байцааж, мэдүүлэг авсан үйл явдлын талаар Хууль зүйн, дотоод хэргийн сайд О.Алтангэрэл өнөөдөр мэдээлэл өглөө. 

Тэрбээр "Шалгаж буй нэр бүхий хүмүүс өнгөрсөн оны зургаадугаар сар, мөн оны есдүгээр сараас эхлэн Эрүүгийн хуулийн тусгай зүйл ангиудаар шалгагдаж байсан гэх мэдээлэл байна. Гэнэт болсон үйл явдал биш. Цагдаагийн байгууллагаас  компьютер техник хэрэгсэлд үзлэг хийж, бэхжүүлж, баримтжуулсан үйл ажиллагааг явуулжээ. Харин энэ үйл ажиллагаа нь хэвлэн нийтлэх эрх чөлөөнд ямар нэг байдлаар хандсан байна уу, хэвлэн нийтлэх контенттой холбоотой байна уу гэдэг дээр анхаарч ажиллаж байна. Эрүүгийн хуулийн "Худал мэдээлэл тараах" гэсэн 13.14 дүгээр зүйл өнөөдөр хүчин төгөлдөр үйлчилж байгаа. Яг одоо сэжиглэн шалгаж  байгаа энэ асуудал нь бусдын хувийн мэдээллийг хууль бусаар цуглуулсан байж болзошгүй сэжиг таамаг байна гэсэн мэдээлэл ирсэн. Нарийн процесс дээр би оролцох эрхгүй. Цагдаагийн байгууллагаас өгсөн мэдээллээр болон урьдчилж хянаснаар 9.3 тэрбум төгрөгийн цахим мөрийтэй тоглоом энэ пэйжтэй холбоотой шалгагдаж байгаа этгээдүүдийн зургаан дансаар дамжин гүйлгээ явсан байна” гэв.

Мөн “2024 оны есдүгээр сараас эхлэн одоо хүртэл Эрүүгийн хуулийн холбогдох зүйл ангиар, тухайлбал, “Бусдыг амиа хорлоход хүргэх зүйл” ангиар шалгагдаж байгаа иргэн бас энэ хүмүүс дунд байна. Үүний цаана хохирогч байна гэсэн үг. Хэрэгт шалгагдаж байгаа зургаан иргэний  дансыг шалгаж байна. Энэ мэдээллүүд худлаа байвал заавал хариуцлага хүлээнэ" гэлээ. 

Б.Лувсанпэрэнлэй