Япон улс жил бүрийн зургаадугаар сарын цалинд судалгаа хийдэг байна. Энэ удаад 50.000-аас дээш компанийг хамруулан судалжээ. 

Өнгөрсөн жилийн зургаадугаар сарын цалингийн дундаж 330.400 иен буюу өнөөдрийн ханшаар 7.599.200 төгрөг байжээ. Компанийн бүтэн цагийн үндсэн ажилтны дундаж цалин гурван жил дараалан өсөж, хамгийн өндөр түвшинд хүрсэн нь энэ аж. 

Эрэгтэйчүүдийн дундаж цалин 363.100 иен буюу 8.351.300 төгрөг байгаа бол эмэгтэйчүүдийнх дунджаар 275.300 иен буюу 6.331.900 төгрөг. Эрэгтэйчүүдийн цалинг 100 хувь гэж үзэн харьцуулвал эмэгтэйчүүдийнх 75.8 хувь байна. 

Эрэгтэй, эмэгтэй хүмүүсийн цалингийн зөрүү 1976 оноос хойш анх удаа хамгийн бага зөрүүтэй болж байгаа нь энэ аж.  

Засгийн газрын зүгээс “Компаниуд цалингийн мэдээллээ ил тод зарлах үүрэгтэй болсон тул эрэгтэй, эмэгтэй хүмүүсийн цалингийн зөрүү багасаж байна” гэж мэдэгджээ. 

Тодруулбал, 2022 оны долоодугаар сарын 8-наас эхлэн 301 буюу түүнээс дээш үндсэн ажилтантай байгууллагууд эрэгтэй, эмэгтэй ажилчдын цалингийн зөрүүг ил тод мэдээлэхийг хуульчилсан байна. Энэ арга хэмжээ нь цалингийн зөрүүг бууруулахад нөлөөлнө гэж үзжээ. 

Цалингийн зөрүүний шалтгааны талаар судлаачид эмэгтэйчүүдийн дунд хугацаат болон хагас цагаар ажиллах хувь өндөр байгааг онцолж байна. 2023 оны байдлаар эмэгтэйчүүдийн 53.2 хувь нь хагас цагаар ажиллаж байсан бол эрэгтэйчүүдийн хувьд энэ үзүүлэлт 22.6 хувь байжээ. Энэ нь цалингийн зөрүү үүсэх нэг гол хүчин зүйл гэжээ. 

Япон улсад эмэгтэй, эрэгтэй хүмүүсийн цалингийн зөрүү багасаж байгаа ч, цаашид илүү тэгш байдлыг хангахын тулд ажлын байрны нөхцөл, хөдөлмөр эрхлэлтийн хэлбэр зэрэгт анхаарах шаардлагатай байна.

Мэдээллийн эх сурвалж: TBS news, NHK ニュース