"Ноорог" медиагийн ажлын байранд нэгжлэг хийж, ажилчдыг нь шөнөжин байцаасан асуудалтай холбогдуулан, үүсгэн байгуулагчдын нэг, “Ноорог креатив” ХХК-ийн захирал О.Уламсайхан болон өмгөөлөгчид өнөөдөр мэдээлэл хийсэн. Тус мэдээллийн үеэр УИХ-ын зарим гишүүн, комедиан залуус ирж өөрсдийн байр суурийг илэрхийлсэн. Мөн болсон үйл явдалтай холбоотойгоор өнөөдөр цагдаагийн байгууллагаас мэдээлэл өгсөн. Уг асуудалтай холбоотойгоор мэдээллийн тэнцвэртэй байдлыг хангахын тулд талуудын байр суурийг хүргэж байна. 

“Ноорог креатив” ХХК-ийн захирал О.Уламсайхан “Фэйсбүүкийн чатаар хуурамч нэртэй, хуурамч хаягаар илгээсэн мэдээллийн дагуу гомдлыг нь хүлээн авч, Кибер гэмт хэрэгтэй тэмцэх албаныхан манай сайтын ажилтнуудыг байцаан, шалгаж байна.  Бид монголд сонгууль хэрхэн болдог тухай кино хийсэн. Гэтэл киноны гол материалыг хадгалсан байсан “HARD”-уудыг хураан авсан. Ямар эд зүйл хураан авсан бүртгэл мэдээлэл ч алга. Бүх хүний хувийн эд зүйлсийг хураан авсан. Утсаа ч хүртэл хураалгасан тул өмгөөлөгч хуульч авах эрхээ эдэлж чадсангүй. Бид 80 сая төгрөгийг баримтат кино хийхдээ зарцуулсан. Энэ мөнгийг олон нийтийн хандиваар босгосон" гэлээ. 

ЦЕГ-ын Хэвлэл мэдээлэл олон нийттэй харилцах хэлтсийн дарга, дэд хурандаа Г.Пүрэвдэлгэр “Ноорог гэх нэртэйгээр цахим орчинд үйл ажиллагаа явуулдаг пэйж хуудасны хэвлэн нийтлэх үйл ажиллагаа буюу мэдээ, нийтлэл, эрхэлж гаргадаг контенттой холбоотойгоор ямар нэгэн мөрдөх байцаах болон гүйцэтгэх ажиллагаа явуулаагүй” гэж мэдээлэв. 

Комедиан Н.Амаржин: Энэ мэтчилэн юм болгоныг барьж хориод, рийл, мийм хийдэг залуучуудад 10-20 жилийн ял тулгаад байж болохгүй. Хэвлэн нийтлэх эрх чөлөөнд халдаж байна. Хууль бус зүйлийн эсрэг шүгэл үлээж байхад ял тулгаж, урьдчилан мэдэгдэлгүй шалгадаг бол ардчилсан нийгэмд бид амьдраад яах юм бэ? Сонгуулийн талаарх баримтат кино хийсэн залуусыг баривчилж байна гэдэг нь манай ардчилал, хэвлэн нийтлэх эрх чөлөөнд ноцтой халдлаа. 

УИХ-ын гишүүн С.Цэнгүүн: Ганц сайтын үйл ажиллагаанаас шалтгаалж, үндэсний эв нэгдэл алдагдана гэдэгт би хувьдаа итгэхгүй байна. Эрүүгийн хуулийн 19.9.1 заалт нь Тагнуулын байгууллагын эрх үүрэгт хамаарах байтал цагдаагийн байгууллага өөрт хамаатуулан гүйцэтгэх ажиллагаа явуулсан нь Эрүүгийн хуулийн зөрчил болох үндэслэл харагдаж байна. 

Эрүүгийн цагдаагийн албаны, Кибер гэмт хэрэгтэй тэмцэх газрын дарга, хурандаа С.Тайван “Хувь хүний нууцыг задруулах, цахим мөрийтэй тоглоом зохион байгуулах зэрэг гэмт хэргийн тодорхой сэжүүр байсан учир холбогдох мөрдөн шалгах ажиллагааг прокурорын хяналтын дор явуулж байна. Хойшлуулшгүй мөрдөн шалгах ажиллагааг прокурорт танилцуулж өчигдөр зохион байгуулсан. Үүний хүрээнд найман иргэнийг дуудан авчирч холбогдох мэдүүлэг тайлбарыг авах гэсэн боловч, долоон иргэн өмгөөлөгчтэй мэдүүлэг өгөхийг хүссэн хүсэлтийг хангаж өчигдрийн 22 цаг 00 минутад авчирч 04 цаг 30 минутад явуулсан. Энэ хуулийнхаа хүрээнд болсон ажиллагаа. Мэдүүлгийг бүрэн камертай өрөөнд хуулийн дагуу явуулсан” гэдэг мэдээлэл өгсөн. 

Өмгөөлөгч П.Эрхэмбаяр "Эрүүгийн  хэрэг хянан шийдвэрлэх тухай хуулийн дагуу явах ёстой. Байгаа газар нь гэнэт очсон гэдэг нэг зөрчил байна. Мөн прокуророос зөвшөөрөл аваагүй, 48 цаг баривчлах хүсэлт гаргахад түүнээс татгалзсан байна. Гэрчээр биш сэжигтнээр мэдүүлэг авсан. Удахгүй яллагдагчаар татах тогтоол танилцуулна. Ингэхээр нөгөө хүний эрхийг хязгаарладаг байдал руу шилжлээ. 19.9.1 буюу "Үндэсний эв нэгдлийг бусниулах" заалтаар бол мэдүүлэг авсангүй. Тэр бол энд харьялагддаггүй зүйл заалт, тагнуулын хийх ажил. Энд бол хүний гомдлоор авчирчхаад шууд сэжигтний мэдүүлэг авч байна. Өмгөөлөгч нар гомдол хүсэлтээ гаргаад явна” гэв. 

Комедиан Д.Амартүвшин: Баримтат киноноос айсан тул эрх баригчид цагдаа нараар ийм зүйл хийлгэлээ. Хөдөө сонгуулийн луйвар цагаандаа гарсан. Ямар ч тэмдэглэл хийлгүйгээр "Ноорог"-ын залуусын олон зүйлийг нь хураан авчээ. Эдгээр залуусыг тагнаж чагнасан байх эрсдэлтэй. Цагдаа нар Үндсэн хуульд тангараг өргөдөг болохоос улс төрчдөд тангараг өргөдөггүй. Үндсэн хуулийг зөрчиж, хүний үг хэлэх үзэл бодлоо илэрхийлэх эрхийг нь зөрчлөө. 

УИХ-ын гишүүн С.Эрдэнэболд: Албан ёсоор Хүний эрхийн дэд хороон дээрээ ажлын хэсэг байгуулж ажиллана. Зөвхөн нэг биш олон тохиолдолд ийм асуудал гарч байна. Монголд ч гэсэн 30 жил арай ядан босож байгаа ардчиллын үнэт зарчим руугаа халдаж байна. “Ноорог”-ийн залуус мэдээлэл хийж байгаа дээр ирж уулзаж, Хүний эрхийн дэд хорооноос энэ асуудлыг анхаарна" гэв.

Б.Лувсанпэрэнлэй