Цусны цагаан эсийн цочмог хавдар өвчнөөр өвчилж БНХАУ-ын эмнэлэгт эмчилгээ хийлгэж буй Д.Тэмүүлэн хүүгийн аав Ж.Доржнямтай ярилцлаа. Уул уурхайн салбарт хүнд машин механизмын оператораар ажилладаг тэрбээр ажлаасаа чөлөө аван эхнэрийн хамт хүүгээ сахиж байгаа юм. 

-Хүүгийн тань бие ямар байна вэ. Уг нь эх орондоо эмчлүүлээд эдгэрнэ гэсэн найдлагатай байжээ.

-Миний хүү Д.Тэмүүлэн цусны цагаан эсийн цочмог хавдар AML С92.0 ЭТО гэх оношоор оношлогдож 2024 оны хоёрдугаар сараас наймдугаар сар хүртэл монголдоо эмчилгээ хийлгэсэн. Гэвч гадуур эмчилгээ хийгдэх явцад “дахилт өгсөн” тул монголд эмчлэгдэх боломжгүй гэсэн хариу авсан. Тэр даруйдаа Бээжин хотод ирж 40 гаруй сая төгрөгийн шинжилгээ өгч онош батлагдсан. Улмаар нийт гурван эмчилгээний төлбөрт 450,000,000 төгрөгийн хэрэгцээ үүсчихээд л дээшээ тэнгэр хол доошоо газар хатуу гэдэг шиг л байна даа. Элэг нэгт ахан дүүс монголчуудаасаа тусламж хүсэж хандивын аян эхлүүлсэн. Хандивын аян үргэлжилж сайхан сэтгэлтэй хүмүүс бидэнд тус дэм болж эхлэхээр хүүгийн, манай гэр бүлийн ч сэтгэл санаа дээрдээд итгэл найдвар төрж байна.  

Хүү маань хими эмчилгээгээ хийлгээд 14 хонож байна. Өнөөдрөөс хими эмчилгээ дууссан. Хими эмчилгээ хийлгээд бүх эс унасан байгаа болохоор ядрангуй болж бага зэргийн хүндрэлүүд гарч эхэлж байна. Өвчин намдаах халуун бууруулах, хордлого тайлах эмчилгээгээ үргэлжлүүлээд явж байгаа. 

-Хими эмчилгээ дууссан юм байна. Дараагийн эмчилгээ юу вэ. Донор олдоо болов уу?

-Хүүхдийн эс өсөөд бие нь сайжирхаар ясны химийн шинжилгээ өгөөд эс хэвийн хэмжээнд хүрсэн бол дараагийн эмчилгээ болох үүдэл эс шилжүүлэн суулгах эмчилгээндээ орно. Хүүгийн маань донорын эсийн шинжилгээний хариу гурав хоногийн өмнө гарсан. Эндэхийн донорын цусны банканд донор хайлгахаар өгсөн байгаа удахгүй хариу ирэх байх. 

"BATNAА entertainment" болон "B Sound production" хамтран “Март-ын 8” баярт зориулсан тоглолт хийж, бүх орлогоо Д.Тэмүүлэнгийн эмчилгээний зардалд хандивлахаар төлөвлөжээ.

-Д.Тэмүүлэн хүүгийн ээжтэйгээ мөрөөдлөө ярьж байгаа бичлэгийг үзсэн. Сэтгэл санааг нь хэвийн байлгах, дэмжих гээд их хичээж байгаа болов уу. Олон түмэн ч хүүг эдгэрээсэй гэж чин сэтгэлээсээ хүсэж байна. Түүний эмчилгээний зардалд зориулсан хандивын тоглолтыг зохион байгуулахаар төлөвлөж буй юм билээ. 

-Хүүгээ дэмжихийн тулд өөрсдөө бас хүчтэй байх хэрэгтэй болж байна. Бид хичээж байгаа. Хандивын аян зарлаад 14 хонож байна. Одоогийн байдлаар 60 гаруй сая төгрөг цугласан байна. Хүүгийн маань эмчилгээний зардал 450 орчим сая төгрөг болно гэсэн. Бидний хүсэл мөрөөдлийг дэмжиж хүүгийн маань эмчилгээний хандивт нэгдэж байгаа элэг нэгт монголчууд, аав ээж, найз нөхөд, ахан дүүс, сайхан сэтгэлээр хандивт нэгдэж урам зоригийн үгс илгээж байгаа бүх хүнд маш их баярлалаа гэж дахин дахин хэлмээр байна. Мөн П.Батням ахын маань санаачилгаар "B Sound production" болон "BATNAА entertainment" хамтран “Март-ын 8” баярт зориулсан тоглолт хийж, тоглолтын бүх орлогоо хүүгийн маань эмчилгээний зардалд хандивлахаар төлөвлөсөн. Энэхүү тоглолтод нэгдсэн гайхалтай уран бүтээлчид, тоглолтыг үзэж гэр бүлд минь урам зориг, итгэл найдвар өгөх хүмүүст үнэхээр талархаж байна. 

-Визийн асуудлаа хэрхэн зохицуулж байгаа вэ, та хэд?

-Визийн асуудал гардаг юм байна. Виз мэдүүлэх иргэн заавал өөрийн биеэр монголдоо байх шаардлагатай байдаг болж. Хүүгийн биеийн байдлыг ажиглах хэрэгтэй байна. 7-10 хоногийн дараа эс өсөж эхлэх үед эмч хүүг замд явж болох эсэхийг хэлж өгнө гэсэн. Бид хэд бол 30 хонохоосоо өмнө буцаж харьж виз даруулах шаардлага үүссэн. Бас нэг ийм том асуудалтай тулчихсан яах учраа олохгүй л байна. 

Д.Тэмүүлэнд туслах хандивын аян үргэлжилж байна.

Д.Тэмүүлэнгийн мөрөөдөл “Эмчилгээгээ хийлгээд хурдан эрүүл болно. Өвөө, эмээ, ах, эгч, найз, хайртай багш нартаа хамгийн сайхан мэдээг дуулгана. Би ирээдүйд Жанг Сүн, Хишигдэлгэр эмч шиг маш мундаг эмч болно. Том болоод та нарынхаа ачийг гэнэтийн бэлгээр маш гоёоор хариулна”. Мөрөөдлийн эмнэлэг, машинаа зураад мянга, мянган хүнийг эмчилж аз жаргалыг түгээнэ гэж ярьж суугаа аюулт өвчинтэй тэмцэж буй бяцхан хүүгийн эмчилгээний төлбөрийн хандивын аянд уншигч та бүхнийг нэгдэхийг хүсэж байна. 

Б.Туяамарал