Булган аймгийн Баяннуур сумын Шар тал багийн “Хар нүдэн” гэдэг газар худаг лайдахаар орсон хүн лаг шаварт шигдэж хөдөлж чадахгүй болсон тухай дуудлага энэ сарын 15-ны өдөр Онцгой байдлын байгууллагад бүртгэгджээ.

Тухайн хүнийг аврахаар тус сум дахь Эрэн хайх, аврах бүлэг, аймгийн Онцгой байдлын газрын Эрэн хайх аврах салбарын алба хаагчид, Баяннуур сумын Тамгын газрын даргаар ахлуулсан иргэд, Цагдаагийн хэсэг, Эрүүл мэндийн төв, “Булган АЗЗА” ТӨХК-ийн нийт 30 гаруй хүн, 20 орчим техник хэрэгсэлтэйгээр ажиллажээ. 

Иргэн Б нь дөрвөн метрийн гүнтэй, 1х1 метрийн харьцаатай худгийн лаг шаварт биеийн бүсэлхий хэсэг хүртэл шигдсэн байсныг энэ сарын 16-ны 15:40 цагт гаргаж сумын Эрүүл мэндийн төвд хүлээлгэн өгчээ. Эрүүл мэндийн төвөөс иргэний биеийн байдал тогтвортой, хэвийн гэж мэдээлсэн байна. 

Б.Лувсанпэрэнлэй