Өвлийн аялал жуулчлалыг хөгжүүлэхэд томоохон байр суурь эзэлдэг "Түмэн тэмээний баяр-2025" Өмнөговь аймгийн Даланзадгад суманд боллоо. Тус үйл ажиллагааны хүрээнд "Монгол тэмээ-Тогтвортой хөгжлийн боломж" хэлэлцүүлэг өрнүүлэв.

Хэлэлцүүлгийн үеэр олон сонирхолтой илтгэл хэлэлцүүлснээс Монгол тэмээ төслийн судлаач, дэд профессор Ч.Жавзандулам “Эрт дээр үеэс иргэд ингэний сүүг эмчилгээ, сувиллын зорилгоор хэрэглэж ирсэн. Орчин үед шинжлэх ухааны үндэслэлтэйгээр чихрийн шижин өвчнийг анагаадаг, аутизм өвчний шинж тэмдгийг бууруулахад тустай, хүний бие махбодод олон төрлийн витамин, эрдэс, амин хүчил, шим тэжээлийг өгдөг ач холбогдолтой хүнсний бүтээгдэхүүн гэж дүгнэсэн” хэмээв. 

Монгол тэмээ төслийн судлаач, дэд профессор Ч.Жавзандулам

Мөн Өмнөговь аймгийн Хүнс, хөдөө аж ахуйн газрын дарга Ш.Бат-Эрдэнэ “Монгол тэмээ – Тогтвортой хөгжлийн боломж" хэлэлцүүлгийн гол зорилго нь тэмээ маллаж байгаа иргэд эдийн засгийн боломжийг яаж бий болгох вэ, мөн одоо олж байгаа ашиг орлогоо цаашид аялал жуулчлал, сүүний үйлдвэрлэл, ноос ноолуур, жуулчдад зориулсан бэлэг дурсгалын бүтээгдэхүүнээр хэрхэн нэмэгдүүлэх боломжийн талаар хэлэлцэж байна. Хэлэлцүүлэгт аймгийн 15 сумаас тус бүр 5-8 эмэгтэй оролцож байна" гэв. 

 Өмнөговь аймгийн Хүнс, хөдөө аж ахуйн газрын дарга Ш.Бат-Эрдэнэ

Өмнөговь аймаг 148 мянган тэмээтэй. Үүнээс жилдээ 15-20 мянган ингэ ботголж, 10 орчим хувийг саадаг байна. Мөн өдөрт дөрвөн тонн сүү хуурайшуулах хүчин чадалтай Ингэний сүүний үйлдвэрийг ашиглалтад оруулан ажиллаж байгаа аж. 

Өмнөговь аймгийн Мандал-Овоо сумын Баянхошуу багийн малчин Р.Ганцэцэг

Өмнөговь аймгийн Мандал-Овоо сумын Баянхошуу багийн малчин Р.Ганцэцэг "Манайх энэ жилийн тооллогоор 170 тэмээ тоолуулсан. Тэмээний ашиг шим их шүү дээ. Манай гэр бүл 2009 оноос хойш “Ингэний айргийн баяр-Өмнөговьд үйлдвэрлэв” үзэсгэлэн худалдаанд оролцож байна. Үзэсгэлэн худалдаанд 200 гаруй литр ингэний айраг, сүү борлуулдаг" гэлээ.

Б.Лувсанпэрэнлэй