Монгол Улсын анхны Ерөнхийлөгч, Бүгд Найрамдах Монгол Ард Улсын Ардын Их Хурлын Тэргүүлэгчдийн дарга, “Чингис хаан” тэргүүн зэргийн одонт, төр, нийгмийн нэрт зүтгэлтэн Пунсалмаагийн Очирбат энэ сарын 17-ны өдөр таалал төгссөн.

Өөд болоочийг сүүлчийн замд нь үдэх ёслолын ажиллагаа Төрийн ордонд боллоо. Монгол Улсын төр, нийгмийн зүтгэлтнүүдийн дурсгалыг хүндэтгэдэг “Алтан-Өлгий” оршоох газар нутаглуулна.  

Мөн өнөөдөр орон даяар Төрийн далбаа бөхийлгөж гашуудал зарлаж буй бөгөөд төрийн албан хаагчид 12:00 цагт 60 секундийн хугацаанд чимээгүй зогсож эмгэнэл илэрхийлэх юм.