Монгол Улсаас Бүгд найрамдах Солонгос улсад суугаа Элчин сайдын яамнаас тус улсад оршин сууж буй монгол иргэдийн талаар зарим тоон мэдээлэл гаргасныг хүргэж байна.

БНСУ-д Монгол Улсын 55,834 иргэн оршин сууж байна. Үүнээс бүртгэлгүй, визийн зөрчилтэй 17,075 иргэн байна.

2024 онд БНСУ-д манай улсын 38 иргэн нас барсан. Үйлдвэрийн болон автын ослоор найм, амиа хорлосон зургаа хүн, бусад нь өвчний улмаас амь хохирчээ. Мөн 917 иргэн гэмт хэрэг, зөрчилд холбогдсон.

Тус улсад Монгол Улсын 23 иргэн хорих ял эдэлж байгаа бөгөөд 18 иргэн урьдчилан хорих төвд шүүхийн хянан шийдвэрлэх ажиллагааны шатанд саатуулагдсан байна.

2023 онд БНСУ-д эмчилгээний шугамаар 22,080 иргэн, (Эмнэлгийн байгууллагаар үйлчлүүлсэн иргэдийн бодит тоо буюу давхардсан тоог хассан) давхардсан тоогоор 71,281 иргэн үйлчилгээ авсан бөгөөд энэ нь нийт гадаадын 605,768 өвчтөний 3,6 хувийг эзэлж байна.

2024 онд ЭСЯ-ны Консулын хэлтэс есөн төрлийн иргэний бүртгэлийн үйлчилгээг 8,915 иргэнд үзүүлж,итгэмжлэл 10,543, хуулбар орчуулга 11,147, гарын үсэг баталгаажуулалт 512, нийт 22,202 нотариатын үйлдлийг гэрчилжээ. Консулын хэлтсийн шуурхай утсанд хандсан 5,200 гаруй иргэнд мэдээлэл, зөвлөгөө өгсөн байна.