Монголын улс төр, шашны нэрт зүтгэлтэн, цэргийн жанжин Зүүнгарын хаант улсын хаан Галдан бошготын мэндэлсний 380 жилийн ойн хүрээнд Чингис хаан Үндэсний музейн "Мөнгөн мод" танхимд "Галдан бошгот хаан-380:Архивын баримтууд" үзэсгэлэн өнөөдөр нээлтээ хийлээ.

Тус үзэсгэлэнд Зүүнгар улсын Галдан бошгот хаанаас Оросын Цагаан хаанд илгээсэн захидал, Манжийн эсрэг хийсэн тэмцлийн түүхэнд холбогдох дурсгалууд, XVII зууны монголын түүхэнд холбогдох баримтууд зэрэг түүхэн ховор нандин үзмэрүүдийг дэлгэжээ.

Галдан Бошгот хаан сан ТББ-ын тэргүүн Н.Батболд "Үнэн түүхэн баримтад тулгуурласан мэдээ баримтыг монголын ард түмэн залуу үедээ танилцуулж, түүхийг зөвөөр ойлгоход маш тустай үзэсгэлэн болж байна" хэмээв. 

Галдан Бошгот хааны түүхэнд гүйцэтгэсэн үүрэг нь Манжийн түрэмгийллийн эсрэг шийдвэртэй тэмцэж, манжийн төрөөс явуулж байсан бодлогыг сөрөн зогсох гол хүчийг толгойлж байсан цэргийн гарамгай жанжин төдийгүй хууль цааз, засаг захиргааны шинэчлэлт хийж, монголчуудын эзэмшил нутгийг Дундад Ази, Дорнод Туркестан хүртэл тэлэхийн зэрэгцээ төмөрлөгийн үйлдвэр байгуулж зэр зэвсэг, хуяг дуулга, сэлэм жадыг үлэмж ихээр хийлгэж бэлтгүүлэн, галт зэвсгийг монгол нутагт анх удаа үйлдвэрлэж байсныг түүхчид хэлж байлаа.

Б.Лувсанпэрэнлэй