Өнөөдөр БШУ-ны сайд Л.Энх-Амгалан салбар дундын удирдах зөвлөлийн ажлын алба, сургуулийн удирдлагуудтай уулзаж, дээд боловсролын тухай хуулийн дагуу судалгааны их сургууль байгуулах нөөц боломжийг дүгнэсэн судалгааны урьдчилсан үр дүнтэй танилцлаа.

Судалгааг дөрвөн бүлэг 27 шалгуурын хүрээнд хийсэн байна. Одоогоор их сургуулиудын хэмжээнд 2800 гаруй судлаач 1637 өгүүлэл олон улсын хэмжээнд нийтлүүлж, 25 патентыг эзэмшиж байна. Энэ нь их сургуулиудад судалгааны нөөц бололцоо их байгааг харуулах боловч олон улстай харьцуулахад чамлахаар үзүүлэлт юм. Тиймээс цаашид санхүүжилтийн болон эрх зүйн орчны хувьд дэмжлэг үзүүлэх байдлаар судалгааны их сургуулийн суурийг бэхжүүлэх шаардлагатай байгааг онцоллоо.

Мөн дундын удирдах зөвлөлийн үйл ажиллагааны чиглэл, журмыг тодорхой болгох, судалгааны их сургууль байгуулсан тохиолдолд дундын удирдах зөвлөлтэй байх, ахисан түвшний сургууль байгуулах, хамгаалуулах зөвлөлийн үйл ажиллагааг уялдуулах талаар санал солилцсон байна.

Монгол Улсын дээд боловсролын сургалтын байгууллагуудын өрсөлдөх чадварыг нэмэгдүүлэх, олон улсын эрэмбийг ахиулах цаашид судалгааны их сургуулийн суурийг тавьж, бэхжүүлэхийн тулд төрийн өмчийн 6 их сургуулийн хамтын ажиллагааг 2021 онд эхлүүлсэн. Энэ хүрээнд харилцан кредит тооцох, дундын лаборатори ашиглах, хөтөлбөрийн давхардлыг арилгахаас эхлээд 37 арга хэмжээг хамтран хэрэгжүүлэхээр төлөвлөсөн. 2023 онд их сургуулиудын дундын удирдах зөвлөлийг байгуулж хамтын ажиллагааны нэгдсэн стратегийг тодорхойлон ажиллаж байна.