Жазз дуучин Ц.Хулан энэ сарын 15-ны үдэш Улаанбаатар зочид буудлын “UB Эвэнт Холл”-д “Khulan jazz concert”-оо тоглох гэж байна.

Орчин үеийн хөгжмийн “эцэг” гэгдэх Classic jazz болон soul, R&B, pop хөгжмийн хэмнэлд мартагдашгүй дурсамж бүтээхийг  хүссэн үзэгчид хэдийн концертын суудлаа захиалаад эхэлжээ.

Түүний бие даасан тоглолтын зочин хөтлөгчөөр хөгжмийн зохиолч, продюсер Б.Наранзун уригдсан бол “THE HU” хамтлагийн үүсгэн байгуулагч Монгол Улсын гавьяат жүжигчин, дуучин, продюсер Б.Дашдондог, “Инээмсэглэл” хамтлагийн дуучин, Монгол Улсын Гавьяат жүжигчин, дуучин Н.Ганхуяг, “Шар айраг” хамтлагийн дуучин Буянаа, Улсын филармонийн гоцлол дуучин Наранбаатар нар хамтран оролцоно.

Дуучин Хулан тоглолтынхоо эхэнд дэлхийн шилдэг классик жазз бүтээлүүдээс, харин хоёр дахь хэсэгтээ өөрийн зүрх сэтгэлд хоногшсон дуэт дуунуудаа тоглохоор төлөвлөжээ.

Жазз хөгжмийг Дэлхийн соёлын төрөл зүйлийг улам баяжуулж, хил хязгаарыг төвөггүй дамнан, хүн төрөлхтнийг нэгтгэдэг хөгжмийн төрөл зүйл болохыг ЮНЕСКО онцолж, 2011 онд /4 дүгээр сарын 30-ны өдөр/ Олон улсын жааз хөгжмийн өдрийг дэлхий дахинаа жил бүр тэмдэглэх шийдвэр гаргасан байдаг.