Гэрэл зургийн эх сурвалж: Pexels
Бизнес эрхлэгч эмэгтэйчүүдийг дэмжиж, тэдэнд мэдлэг, мэдээлэл өгөх нэгэн хөтөлбөрт хамрагдлаа. Гутал оёдог, цай үйлдвэрлэдэг, цэцэг зардаг, банш хийдэг, мэдээ бичдэг ... ажил хийж байж амьдарна тэгэхдээ бусдад хэрэгтэй зүйл хийнэ гэсэн бодол, зорилготой эмэгтэйчүүд, ээжүүд, эзэгтэй нар буюу өөр өөрийн бизнесээ үүсгэн байгуулагчид бас захирлууд цугласан байв.
Гурван жилийн өмнөх буюу хамгийн сүүлийн үеийн судалгаагаар Монгол Улсын ДНБ-ний 17,8 хувийг жижиг, дунд үйлдвэрлэл эзэлдэг бөгөөд нийт ажиллах хүчний 72 хувийг бүрдүүлдэг гэжээ. Үүнээс жижиг дунд үйлдвэрлэл нь хөдөлмөрийн зах зээл, үйлдвэрлэл, эдийн засгийн өсөлтөд голлох үүрэг гүйцэтгэдгийг харж болно. 2021 оны байдлаар эмэгтэйчүүд Монгол Улсын нийт бизнес эрхлэгчдийн 37 хувийг, жижиг, дунд бизнес эрхлэгчдийн 68 хувийг эзэлдэг гэсэн тоог Үндэсний статистикийн хорооноос гаргажээ. Энэ дотроо худалдаа, үйлчилгээний салбарт мөн л эмэгтэйчүүд давамгайлдаг.
Өр зээл тавьж эхлүүлсэн зүгээр суух завдал өгөхгүй бизнесээсээ болон өөрийн гэр орон, үр хүүхдэдээ тавьдаг анхаарлаасаа бүтэн гурван цагийг өөртөө зарцуулж чадах боломжтой эмэгтэйчүүд эл хөтөлбөрт хамрагдсан билээ. Тэдний зорилго адилхан байгаа шигээ ажил, бизнест нь тулгарч буй саад бэрхшээл, хүндрэл ч нэг л агуулгатай байсан юм.
Учир нь аливаа улсын нийгэм, эдийн засгийн өсөлт, ард иргэдийн амьдралд хамгийн хэрэгтэй, тустай үйл ажиллагаа буюу хувиараа бизнес эрхлэгчид, жижиг, дунд үйлдвэр, үйлчилгээ явуулахыг хүссэн хүмүүст ээлгүй орчин бол өнөөгийн Монгол Улсын төрийн бодлого, хууль эрх зүйн нөхцөл байдал юм.
Үйл ажиллагааг нь зохицуулах хууль, тодорхойлох дүрэм журам байхгүй, төр засгийн зүгээс бодит тусламж, дэмжлэггүй ч татварын дарамт, банкны шаардлага, ар амьдралын асуудалд үл ажрах монгол эмэгтэйчүүдийн эр зориг дээр л өнөөдрийн жижиг, дунд үйлдвэр тогтож байна. Өөрөөр хэлбэл энэ салбарын эдийн засгийн гол нь эмэгтэйчүүдийн нуруун дээр явна.
