Монголын газарзүйн багш нарын холбоо, Монголын газарзүйн боловсролын нийгэмлэг, Монгол Улсын Боловсролын их сургууль хамтран зохион байгуулдаг “ЕБС-ийн Газарзүйн судлагдахууны тулгамдсан асуудал, шийдэл” сэдэвт уламжлалт уулзалт, хэлэлцүүлэг энэ сарын 18-19-нд боллоо.

Уг уулзалт, хэлэлцүүлгээр ЕБС-ийн газарзүйн багш нарт тулгамдаж буй нийтлэг асуудлууд, газарзүйн мэргэжлийн багшийн нөөцийн дутагдал, хичээлийн цагийн хүртээмж, газарзүйн багш нарын нийгмийн асуудлыг хэлэлцлээ. 

Мөн ЭЕШ өгөх, их дээд сургуульд газарзүйн мэргэжлээр элсэгчдийн өнөөгийн нөхцөл байдлын талаар санал бодлоо хэлэлцэн, эдгээр асуудалд шийдэл олох, газарзүйн хичээлийн үнэлэмжийг дээшлүүлэх, газарзүйн сургалтын үйл ажиллагааг сайжруулах, шат, шатны багш нар харилцан туршлага солилцох, хамтын ажиллагааг өргөжүүлэх үйл ажиллагаа болдог юм.

Уулзалт, хэлэлцүүлэгт 18 аймгийн 170 гаруй багш, нийслэлийн есөн дүүргийн 70 гаруй багш, Боловсролын яам, Боловсролын ерөнхий газар, Боловсролын судалгааны үндэсний хүрээлэн, Боловсролын үнэлгээний төв, МУБИС, МУИС зэрэг мэргэжлийн байгууллагуудын төлөөлөл оролцов. Оролцогчид Монгол Улсын газарзүйн шинжлэх ухааны судалгааны өнөөгийн байдал, цаашдын хөгжил, газарзүйн ухааны тулгамдсан асуудлууд, XXI зууны газарзүйн боловсролын чиг хандлага, газарзүйн сургалтын хөтөлбөрийн шинэчлэл, ЕБС-ийн газарзүйн судлагдахуун болон багш нарт тулгамдаж буй асуудлуудын талаар өргөн хүрээнд хэлэлцлээ.

Газарзүйн багш нарын уулзалт, хэлэлцүүлэг боллоо.

Хэлэлцүүлгийг МУБИС-ийн газарзүйн тэнхимийн эрхлэгч, доктор Х.Цогбадрал, Монголын газарзүйн багш нарын холбооны тэргүүн Ц.Даш нар удирдан явуулав. Монголын газарзүйн боловсролын нийгэмлэгийн тэргүүн, МУБИС-ийн газарзүйн тэнхимийн ахлах багш, профессор Е.Батчулуун “21-р зууны газарзүйн боловсрол хаана явна вэ?” доктор Г.Уранчимэг “Асуудалд суурилсан сургалтын загварыг газарзүйн хичээлд туршсан үр дүн”, дэд профессор Ц.Сэр-Од “Багш, газарзүйн боловсрол бакалаврын хөтөлбөрийн өнөөгийн байдал, тулгамдаж буй асуудал” сэдэвт илтгэлүүд хэлэлцүүлсэн юм.

МУИС-ийн газарзүйн тэнхимийн профессор В.Батцэнгэл “Газарзүйн ухааны тулгамдсан асуудлууд”, доктор Г.Бямбахүү “Газарзүйн шинжлэх ухааны судалгааны өнөөгийн байдал, цаашдын чиг хандлага”, БСҮХ-ийн эрдэм шинжилгээний ажилтан Б.Алтансүх, Дархан-Уул аймгийн 31 дүгээр сургуулийн газарзүйн багш Б.Эрдэнэчимэг, есдүгээр сургуулийн багш Д.Урантуяа нар газарзүйн хичээлийн хөтөлбөрийн хэрэгжилт орон нутгийн хүрээнд ямар байгаа талаар судалгаат илтгэл танилцууллаа.

Хэлэлцүүлгийн үр дүнд газарзүйн хичээлийн цагийг нэмэгдүүлж VI ангид газарзүйн хичээл оруулах тухай саналыг Боловсролын яаманд хүргүүлэх, IV, V ангийн Хүн байгаль хичээлийг байгалийн ухааны багш нар орох боломж байгаа эсэхийг тодруулах, газарзүйн багш нарын мэдлэг, аргазүйн хөгжилд дэмжлэг үзүүлж, багш нараа чадавхжуулах ажлыг зохион байгуулахад санал нэгджээ.