УИХ-ын сонгуульд ХҮН намын жагсаалтын дөрөвдүгээрт бичигдэн нэр дэвшиж буй хууль зүйн ухааны магистр Г.Уянгахишиг гэж хэн бэ? Түүний тухай 10 баримтыг хүргэж байна. 

1. Гончигдоржийн Уянгахишиг. УИХ-ын дарга асан, АН-ын гишүүн Р.Гончигдоржийн ууган охин. Гэр бүлтэй, гурван хүүхдийн ээж. 

2. 1994 онд нийслэлийн лаборатори нэгдүгээр дунд сургуулийн математикийн гүнзгийрүүлсэн сургалттай ангийг төгссөн. Ингэхдээ анги алгасан суралцаж байжээ. 

3. 1998 онд МУИС-ийг эрх зүйч мэргэжлээр төгссөн. 2002 онд ХБНГУ-ын Бонн хотын их сургуульд хууль зүйн ухааны магистрын зэрэг хамгаалсан. Их сургуульд суралцахдаа Германы Социал демократ намын дэргэдэх Фридрих Эбертийн сангаас тэтгэлэг авч байжээ. 

4. Ажлын талбарт гарсан цагаасаа өнөөдрийг хүртэл зөвхөн хувийн хэвшилд ажилласан байна. Тухайлбал, 2002-2010 онд  хууль зүйн “Цэц” товчоонд өмгөөлөгч, 2010-2012 онд “Си Энд Жи Партнерс” хуулийн фирмийн үүсгэн байгуулагч, 2012-2014 “Шунхлай Групп” ХХК-д хууль, эрх зүй хариуцсан захирал, 2015-2018 онд “Голомт Банк” ХХК-д хуулийн хэлтсийн захирлаар ажиллаж байгаад  2018 оноос “Инвескор Капитал ҮЦК” ХХК-ийн гүйцэтгэх захирал, ТУЗ-ийн даргын үүрэг гүйцэтгэж иржээ. 

5. 1999 онд Монголын социал демократ намын гишүүнээр элсэж байжээ. Гэвч 21 жилийн дараа сонголтоо өөрчилж ХҮН намд элссэн. ХҮН намын удирдах зөвлөлийн гишүүн. 

6. 2020 оны УИХ-ын сонгуулийн 22 дугаар тойрог буюу Баянзүрх дүүрэгт Хөдөлмөрийн үндэсний нам, Монголын социал демократ нам, Зүй ёс намын нэгдсэн “Зөв хүн электорат эвсэл”-ээс нэр дэвшин өрсөлдөж байсан. Мөн оны НИТХ-ын сонгуульд өрсөлдсөн боловч олонхын санал аваагүй. 

7. Монголын хуульчдын холбооны гишүүн. Концессын тухай хуулийн төсөл, Банкны тухай хуульд нэмэлт, өөрчлөлт оруулах тухай хуулийн төсөл, Татварын багц хуулийн төсөл, Хөрөнгийн зах зээлийн холбогдох хууль эрх зүйн орчныг сайжруулах багц хуулийн төсөл зэрэг хууль тогтоомжийн төсөл дээр төрийн эрх бүхий байгууллагуудтай хамтарсан ажлын хэсгүүдэд орж ажиллажээ. 

8. Үнэт цаасны зах зээлд Хөрөнгө оруулалтын чиглэлээр ажил үйлчилгээ явуулах эрхтэй. Ашигт малтмалын эрх зүй, татвар, хөрөнгийн зах зээлийн чиглэлээр мэргэшсэн.

9. Хилийн боомтуудаар ачаа, тээвэр, нүүрс нэвтрүүлэх болон чөлөөт бүсийн үйл ажиллагаанд учирч байгаа хүндрэлийг шалган тогтоох шалгах үүрэг бүхий түр хорооны шинжээчээр ажиллаж байжээ. Энэхүү түр хороо нь нийтийн дунд “нүүрсний” гэх тодотголтой байсан юм. 

10. Г.Уянгахишиг 1998 онд Боловсролын зээлийн сангаас 6,584 ам.долларын сургалтын төлбөрийн зээл авч ХБНГУ-ын Бонн хотын их сургуульд суралцжээ. Боловсролын зээлийн сангийн мэдээлэлд түүний суралцах жил 3, эргэж төлөх хугацааг журам болон гэрээнд тусгаагүй гэж тэмдэглэсэн бөгөөд зээлийн үлдэгдэл 0 ам.доллар буюу өргүй гэж тэмдэглэсэн байна.